အင်အားပြင်းငလျင် လှုပ်ခတ်မှုကြောင့် သေဆုံးခဲ့ရတဲ့ အထောက်အထားရှိ ရွှေ့ပြောင်းအလုပ်သမားတွေအတွက် တယောက်ကို ထိုင်းဘတ်ငွေ ၁၇ သိန်းစီ ပေးသွားမယ်လို့ ထိုင်းအစိုးရက ဧပြီ ၂ ရက်မှာ ထုတ်ပြန်လိုက်တယ်လို့ WAG ရွှေ့ပြောင်းမြန်မာအလုပ်သမား ကူညီစောင့်ရှောက်ရေးအဖွဲ့က ပြောပါတယ်။
သေဆုံးသူ ၁၅ ယောက်ထဲမှာ မြန်မာ၊ ကမ္ဘောဒီးယား၊ လာအိုတို့က ရွှေ့ပြောင်းအလုပ်သမားတွေ ပါဝင်တယ်လို့ သိရပြီး အထောက်အထားမဲ့ သေဆုံးသူ အလုပ်သမားတွေအတွက်ကိုတော့ သက်ဆိုင်ရာ လုပ်ငန်းရှင်ကနေ လျော်ကြေးငွေ ပေးအပ်ရမယ်ဆိုပြီး ထုတ်ပြန်ထားကြောင်း WAG ရွှေ့ပြောင်းမြန်မာအလုပ်သမား ကူညီစောင့်ရှောက်ရေးအဖွဲ့မှ ကိုမုန်တိုင်းက ပြောပါတယ်။
“ဒီနေ့ ထိုင်းအစိုးရက တရားဝင်ထုတ်ပြန်ထားတာက တရားဝင်အလုပ်သမားတယောက်ကို ဘတ်ငွေ ၁၇ သိန်းစီ ပေးမယ်လို့ ထုတ်ပြန်ထားတယ်။ အထောက်အထားမရှိတဲ့ အလုပ်သမားတွေကျတော့ သူဌေးကပဲ လျော်ရမယ်ဆိုပြီး ထုတ်ပြန်ထားတယ်။ သေဆုံးသူ ၁၅ ယောက်မှာက မြန်မာလူမျိုး ဆိုပြီး တိကျကျ မခွဲထားဘူး။”
နောက်ဆုံးသိထားချက်အရ ငလျင်ဒဏ်ကြောင့် အဆောက်အအုံ ပြိုကျပြီး သေဆုံးခဲ့ရသူဦးရေ ၁၅ ယောက်အထိရှိပြီးတော့ ဆေးကုသနေသူ ၉ ယောက်၊ ကျန်ရှိသူ ၇၂ ယောက်နဲ့ ပျောက်ဆုံးသူ ၉၆ ယောက်အထိရှိတယ်လို့ WAG ရွှေ့ပြောင်းမြန်မာအလုပ်သမား ကူညီစောင့်ရှောက်ရေးအဖွဲ့က ပြောပါတယ်။
မတ် ၂၈ ရက်က လှုပ်ခတ်ခဲ့တဲ့ အင်အားပြင်းငလျင်ကြောင့် မြန်မာအလုပ်သမားတွေ အလုပ်လုပ်ကိုင်နေတဲ့ ဘန်ကောက်မြို့ရှိ ဆောက်လက်စအထပ်မြင့် အဆောက်အအုံမှာ လုံးဝ ပြိုကျပျက်စီးခဲ့ရပြီးနောက် ထိုင်းဝန်ကြီးချုပ်ကိုယ်တိုင် လာရောက်ကြည့်ရှုခဲ့ကာ ရှာဖွေကယ်ဆယ်ရေးတွေကိုလည်း ဆက်လက်လုပ်ဆောင်နေ ပါတယ်။
Photo: WAG ရွှေ့ပြောင်းမြန်မာအလုပ်သမားကူညီစောင့်ရှောက်ရေးအဖွဲ့
