လွန်ခဲ့တဲ့ ဖေဖော်ဝါရီလမှာ မိမိကိုယ်ကို အဆုံးစီရင်သွားတဲ့ အမျိုးသမီးသရုပ်ဆောင် ကင်မ်ဆဲရွန် နဲ့ ပတ်သက်ပြီး အမျိုးသားသရုပ်ဆောင် ကင်မ်ဆိုဟွန်က စွပ်စွဲချက်တွေကို ငြင်းဆိုလိုက်ပါတယ်။
အသက် ၃၇ နှစ်အရွယ် တောင်ကိုရီးယား ထိပ်တန်းသရုပ်ဆောင်က " ကျနော်မလုပ်ခဲ့တဲ့ အရာကို ဝန်ခံလို့မရပါဘူး " ဆိုပြီး တနင်္လာနေ့မှာပြုလုပ်ခဲ့တဲ့ သတင်းစာရှင်းလင်းပွဲအတွင်း မျက်ရည်တွေနဲ့ ပြောသွားပါတယ်။
အဲဒီအရှုပ်တော်ပုံအတွင်း အဓိကကျတဲ့စွပ်စွဲချက် ၂ ခုပါဝင်နေပြီး အဆုံးစီရင်မှုနဲ့ ဆက်စပ် နေတယ်လို့ ဆိုပါတယ်။
ဒါဟာ ကင်မ်ဆဲရွန် အသက်မပြည့်ခင် ၁၅ နှစ်အရွယ်မှာ ချစ်သူတွေဖြစ်ခဲ့ကြတာနဲ့ ကင်မ်ဆိုဟွန်ရဲ့အေဂျင်စီက အကြွေးပြန်ဆပ်ဖို့ ဖိအားပေးခဲ့တယ်ဆိုတဲ့ အချက်ပဲဖြစ်ပါတယ်။
ဒီဖြစ်ရပ်ကြောင့် တောင်ကိုရီးယား အနုပညာလောကကို အကြီးအကျယ် လှုပ်ခတ်စေခဲ့သလို ကင်မ်ဆိုဟွန်ကလည်း ပြင်းထန်တဲ့ဝေဖန်မှုတွေနဲ့ ရင်ဆိုင်လာရပါတယ်။
အဲဒီနောက် ကင်မ်ဆိုဟွန်ဟာ ကင်မ်ဆဲရွန် အရွယ်ရောက်ပြီးချိန်မှာ ၁ နှစ်ကြာတွဲခဲ့တယ်လို့ ဝန်ခံသွားပေမဲ့ အသက်မပြည့်သေးခင်မှာတော့ ဘာမှမဟုတ်ခဲ့ဘူးလို့ တုံ့ပြန်ပါတယ်။
"ကျနော့်ကြောင့် လူပေါင်းများစွာ ဒုက္ခရောက်ရပါတယ်"လို့လည်း ကင်မ်ဆိုဟွန် က ပရိသတ်တွေနဲ့ ဝန်ထမ်းတွေကို တောင်းပန်သွားပါတယ်။
ဒါ့အပြင် "ကွယ်လွန်သူမင်းသမီးအနေနဲ့ အေးချမ်းစွာအနားမရသေးတဲ့အတွက်ပါ စိတ်မကောင်းဖြစ်ရပါတယ်"ဆိုပြီး ဖြည့်စွက်ပြောပါတယ်။
ကင်မ်ဆဲရွန် ကွယ်လွန်ပြီးနောက် တလမပြည့်သေးခင် မတ်လ ၁၀ ရက်မှာ Youtube ချန်နယ်တခုကနေ ဒီကိစ္စကို ဖွင့်ချခဲ့တာပါ။
၂၀၂၂ တုန်းက အရက်သောက်ပြီး ကားမောင်းခဲ့တာကြောင့် ဝမ်ငွေ သန်း ၂၀ ဒဏ်ကြေးဆောင်ခဲ့ ရတဲ့ ကင်မ်ဆဲရွန်ကို အွန်လိုင်းပေါ်မှာ အမုန်းစကားပြောဆိုမှုတွေ ရှိခဲ့ဖူးပါတယ်။
ကင်မ်ဆဲရွန် မိသားစုရဲ့ ရှေ့နေဘက်က ပြီးခဲ့တဲ့အပတ်မှာ သတင်းစာရှင်းလင်းပွဲ ပြုလုပ်ပြီး အသက် ၁၆ နှစ်အရွယ်မှာ ဒီသရုပ်ဆောင် ၂ ယောက် အကြား စကားပြောဆိုခဲ့တဲ့ မှတ်တမ်းကို ထုတ်ပြသွားပါတယ်။
ဒါကြောင့် မင်းသားရဲ့ ရှေ့နေဘက်က ကင်မ်ဆဲရွန် မိသားစုနဲ့ Youtube ချန်နယ်ပိုင်ရှင်ကို ရာဇဝတ်မှုစွဲချက်တခု အပါအဝင် ဝမ် ၁၂ ဘီလီယံ နစ်နာကြေး တောင်းထားတဲ့ အရပ်ဘက်တရားမမှုတခုနဲ့ပါ အမှုဖွင့်ထားကြောင်း အတည်ပြုပါတယ်။
ကင်မ်ဆိုဟွန်ဟာ တောင်ကိုရီးယားရဲ့ A-list စာရင်းဝင် သရုပ်ဆောင်ဖြစ်ပေမဲ့ အခုလိုမျိုး အငြင်းပွားဖွယ်ရာ ပြသာနာတွေကြောင့် ကြော်ငြာစာချုပ်အများအပြား ဖျက်သိမ်းခံရတာမျိုးအထိ ရှိလာခဲ့ပါတယ်။
တောင်ကိုရီးယားနိုင်ငံမှာ အနုပညာရှင်တွေရဲ့ အချစ်ရေးအချစ်ရာ ဒါမှမဟုတ် လက်တွဲဖော် ရှိကြောင်း ဝန်ခံပြောဆိုတာကို ပရိသတ် တွေဘက်က မလိုလားဘဲ စောင့်ကြည့်လေ့ရှိကြပါတယ်။
Source: Reuters
