မန္တလေးမြို့၊ မစိုးရိမ်ကျောင်းတိုက်တွေက သံဃာတော် ၃၀ ကျော်ဟာ ငလျင်ဒဏ်ကြောင့် ပျံလွန်တော်မူခဲ့သလို သံဃာတော် ၅၀ ကျော်ဟာလည်း ထိခိုက်ဒဏ်ရာရရှိခဲ့ကြပြီး လူတချို့လည်း သေဆုံး ဒဏ်ရာရခဲ့တယ်လို့ အဆိုပါကျောင်းတိုက်တွေရဲ့ သံဃာတော်တွေဆီကနေ သိရပါတယ်။

မစိုးရိမ်ကျောင်းတိုက်ကြီး (တိုက်ဟောင်း) ရဲ့ ဆရာတော်တပါးဖြစ်တဲ့ အရှင်ဓမ္မသာမီဘိဝံသက “ငလျင်ဒဏ်ကြောင့် နှစ်ပေါင်း ၁၁၇ နှစ်ရှိပြီဖြစ်တဲ့ မစိုးရိမ်တိုက်ဟောင်းက သံဃာတော် ၁၈ ပါး ပျံတော်မူပြီး လူပုဂ္ဂိုလ် ၅ ယောက် သေဆုံးပါတယ်။ စာဖြေဌာနကို ရောက်နေတဲ့အချိန် ငလျင်လှုပ်တော့ ကျောင်းမှာကျန်နေတဲ့ မယ်တော်ကြီးနဲ့ နှမဖြစ်သူလည်း ကျောင်းပြိုကျတဲ့အထဲမှာ ပါသွားပြီး ဆုံးသွားခဲ့ပါတယ်။ ဒဏ်ရာရတဲ့သူတွေကတော့ သံဃာတော်က ၁၂ ပါးနဲ့ လူပုဂ္ဂိုလ်တယောက် ဖြစ်ပါတယ်။ ကျောင်းတိုက်ထဲက ကျောင်းဆောင်အားလုံးလည်း တခုမှ အကောင်းမကျန်ပါဘူး။ အပျက်အစီးများတာနဲ့ နည်းတာပဲ ကွာပါတယ်” လို့ မိန့်ကြားပါတယ်။

ဒါ့အပြင် မစိုးရိမ်တိုက်သစ်က သံဃာတော် ၂၁ ပါး ငလျင်ဒဏ်ကြောင့် ပျံလွန်တော်မူခဲ့ရပြီး ဒဏ်ရာရရှိခဲ့ကြသူတွေလည်း ရှိသလို လူပုဂ္ဂိုလ်တွေလည်း သေဆုံးဒဏ်ရာရခဲ့ကြတယ်လို့ ဆိုပါတယ်။

မစိုးရိမ်တိုက်သစ်က စာသင်သား အရှင်ပညာစာရ ကလည်း “ဦးပဥ္စင်းတို့ မစိုးရိမ်တိုက်သစ်ကလည်း ကျောင်းဆောင်တွေ အထိအခိုက် အပျက်အစီး များပါတယ်။ ကျောင်းဆောင်အားလုံး ထိခိုက်ပျက်စီးခဲ့ပါတယ်။ ငလျင်ဒဏ်ကြောင့်မို့ ကျောင်းတိုက်က သံဃာတော် ၂၁ ပါး ပျံလွန်တော်မူခဲ့ပါတယ်။ ဒဏ်ရာရတဲ့ သံဃာတော်တွေကတော့ ၄၅ ပါး ရှိပါတယ်။ ဒဏ်ရာရတဲ့ သံဃာတော်တွေကတော့ ဆေးကုသမှုတွေ ခံယူနေကြပါတယ်။ အပျက်အစီးတွေအောက်မှာ ရှိနေနိုင်သေးလို့ အတိအကျကတော့ ဘယ်သိနိုင်ဦးမလဲ။ ကြံဖန်ပြီး ကျေးဇူးတင်ရမှာက နာရီစင်ကြီးပါပဲ။ နာရီစင်ကြီးက ငလျင်လှုပ်လှုပ်ချင်း ပြိုကျသွားတယ်။ နာရီစင်ပြိုတော့ စာသင်သားသံဃာတွေက ကျောင်းဆောင်အသီးသီးကနေ အောက်ဆင်းလာခဲ့ကြတယ်။ သံဃာတော်များ မြေပြင်ရောက်မှ ငါးထပ်ကျောင်းဆောင်ကြီးက ပြိုကျခဲ့တာ” လို့ DVB ကို မိန့်ပါတယ်။

မန္တလေးမြို့မှာ ဧပြီ ၁ ရက်အထိ နောက်ဆက်တွဲငလျင်တွေ နေ့စဉ်လိုလို လှုပ်ခတ်နေတဲ့အတွက် သံဃာတော်တွေ အပါအဝင် မြို့ခံပြည်သူတွေဟာ ညစဉ်ညတိုင်း လမ်းမတွေနဲ့ ကွင်းပြင်တွေပေါ်မှာ အိပ်စက်နေကြရပါတယ်။

ဧပြီ ၁ ရက်အထိ ရရှိထားတဲ့ စာရင်းတွေအရ ငလျင်ဒဏ်ကြောင့် မန္တလေးမှာရှိတဲ့ ကျောင်းတိုက်တွေက သံဃာတော်တွေ ပျံလွန်တော်မူတာ အပါး ၁၀၀ ကျော်ပြီ ဖြစ်တယ်လို့လည်း သိရပါတယ်။