ပြီးခဲ့တဲ့ရက်ပိုင်းကမှ ငလျင်ဒဏ်အပြင်းအထန် အခံလိုက်ရတဲ့ မန္တလေးမြို့အနီးကို ဧပြီ ၁ ရက် မြန်မာစံတော်ချိန် ဒီနေ့ ညနေ ၅ နာရီ ၃၁ မိနစ်မှာ အင်အားအတင့်အသင့်ရှိတဲ့ ငလျင်တခု ထပ်မံ လှုပ်ခတ်သွားတယ်လို့ အမေရိကန်ဘူမိဗေဒလေ့လာရေးအဖွဲ့ (USGS) ရဲ့ တိုင်းထွာချက်တွေအရ သိရပါတယ်။
မြေငလျင်က မန္တလေးမြို့နဲ့ ၁၆ ကီလိုမီတာအကွာမှာ လှုပ်ခတ်ခဲ့တာဖြစ်ပြီး မန္တလေးမှာ ကူညီကယ်ဆယ်ရေးတွေ လုပ်ဆောင်ချိန် ငလျင်လှုပ်ခတ်မှုကို ခံစားလိုက်ရကြောင်း ကယ်ဆယ်ရေး လုပ်ဆောင်နေသူတွေဆီက သိရပါတယ်၊
မန္တလေး၊ စစ်ကိုင်းနဲ့ ပြင်ဦးလွင်က ပြည်သူတွေ သိသာတဲ့ လှုပ်ခတ်မှုကို ခံစားလိုက်ရတယ်လို့ ဒေသခံတွေက သူတို့လူမှုကွန်ယက်စာမျက်နှာတွေမှာ မျှဝေထားကြပါတယ်။
မတ်လ ၂၈ ရက် မွန်းလွဲပိုင်းက စစ်ကိုင်းနဲ့ မန္တလေးကို ဗဟိုပြုလှုပ်ခတ်ခဲ့တဲ့ ပြင်းအား ၇ ဒသမ ၇ ရှိတဲ့ ငလျင်နောက်ဆက်တွဲအနေနဲ့ ဧပြီ ၁ ရက်၊ ညနေ ၃ နာရီ ၃၀ မိနစ် အထိ နောက်ဆက်တွဲငလျင်အကြိမ်ရေ ၂၄၀ ကျော် ရှိလာပြီ ဖြစ်ပါတယ်။
