ငလျင်လှုပ်ခတ်မှုကြောင့် မန္တလေးတိုင်းထဲက အဆောက်အအုံ ထိခိုက်ပျက်စီးမှုတွေထဲ ၄ ရက်တာမှာ အသက်ရှင်သူ ၄၀၃ ယောက်နဲ့ သေဆုံးသူ ၂၅၉ ယောက်တို့ကို ထုတ်ယူနိုင်ခဲ့တယ်လို့ မြန်မာနိုင်ငံ မီးသတ်တပ်ဖွဲ့က မတ်လ ၃၁ ရက်ညမှာ ထုတ်ပြန်ပါတယ်။
ငလျင်စတင်လှုပ်ခတ်တဲ့ မတ် ၂၈ မွန်းလွဲပိုင်းကနေ မတ် ၃၁ ရက်အထိ မြန်မာနိုင်ငံမီးသတ်တပ်ဖွဲ့က ရှာဖွေကယ်ဆယ်ရေးတပ်ဖွဲ့ဝင်တွေ၊ တရုတ်၊ ရုရှားနဲ့ အိန္ဒိယနိုင်ငံတို့ ရောက်ရှိနေတဲ့ ကူညီ ရှာဖွေကယ်ဆယ်ရေး တပ်ဖွဲ့ဝင်တွေ ဆောင်ရွက်ခဲ့ကြတာပါ။
မတ် ၃၁ ရက်မှာတော့ အမျိုးသမီး ၅ ယောက်ကို အသက်ရှင်လျက် ကယ်ထုတ်နိုင်ခဲ့ပြီး သေဆုံးသူ အမျိုးသား ၁၆ ယောက်၊ အမျိုးသမီး ၁၁ ယောက်၊ စုစုပေါင်း သေဆုံးသူ ၂၇ ယောက်တို့ရဲ့ ရုပ်အလောင်းတွေကို ထုတ်ယူနိုင်ခဲ့တယ်လို့ သိရပါတယ်။
ငလျင်ဒဏ်ကြောင့် သေဆုံးသူတွေက မတ် ၃၁ ရက်၊ မြန်မာစံတော်ချိန် ည ၈ နာရီအထိ မြန်မာတနိုင်ငံလုံးမှာ ၃,၁၉၅ ယောက် ရှိလာပြီလို့ DVB က ကောက်ယူထားတဲ့စာရင်းတွေအရ သိရပါတယ်။
