မြန်မာငလျင်ဘေးနဲ့ပတ်သက်ပြီး စစ်ကောင်စီက နိုင်ငံခြားသတင်းမီဒီယာတွေကို မြန်မာနိုင်ငံဆီ လာရောက်ခွင့်မပေးဘဲ သတင်းယူခွင့်ပိတ်ပင်လိုက်တာဟာ ငလျင်ဘေးသင့်ပြည်သူတွေအတွက် နိုင်ငံတကာအစိုးရနဲ့ ပြည်သူတွေဆီက ရနိုင်တဲ့ အကူအညီတွေကို ပိတ်ပင်တဲ့လုပ်ရပ်လို့ ဝါရင့်သတင်းစာဆရာ ဦးမြင့်ကျော်က သုံးသပ်ပါတယ်။
“ဒီလိုသဘာဝဘေးအန္တရာယ် ကျရောက်တဲ့ နေရာတွေကို ကိုယ်တိုင်သွားရောက်ပြီးတော့ သူတို့ တင်ပြတယ်။ အဲဒီလို တင်ပြတာတွေက ပြည်သူလူထုရော၊ အစိုးရတွေရော မြန်မာနိုင်ငံရဲ့ ငလျင်ဘေးအကူအညီပေးဖို့ အများကြီး သက်ရောက်မှုတွေ ရှိတယ်။ ဒီအချိန်မှာ ဒါမျိုးကို မတားဆီးသင့်ဘူး။ ဒီလို တားဆီးတာက ရနိုင်တဲ့ အခွင့်အလမ်းတွေကို တားဆီးလိုက်သလို ဖြစ်စေတယ်။”
စစ်ကောင်စီအနေနဲ့ နိုင်ငံရေးဆိုင်ရာ စိုးရိမ်မှုတွေနဲ့ နိုင်ငံခြားမီဒီယာတွေကို မြန်မာနိုင်ငံထဲ ဝင်ရောက် သတင်းယူခွင့်ပိတ်ပင်တာဖြစ်ပြီး မြန်မာလူထု ရင်ဆိုင်ကြုံတွေ့နေရတဲ့ ငလျင်ဘေးအခြေအနေနဲ့ပတ်သက်ပြီး နိုင်ငံတကာကို သိရှိစေနိုင်ခွင့်လည်း ဆုံးရှုံးသွားတယ်လို့ သတင်းစာဆရာ ဦးမြင့်ကျော်က ဆက်ပြောပါတယ်။
“တခြားသော နိုင်ငံရေး ရှုထောင့်ကနေ စိုးရိမ်မှုတွေနဲ့ ဒီဟာမျိုးကို တားမြစ်တာလို့ မြင်တယ်။ ဒီဟာကတော့ ငလျင်ဒဏ်ခံနေရတဲ့ လူတွေရဲ့ အကူအညီရရှိရေးကို အတားအဆီးဖြစ်စေတယ်၊ ဒါကို ပိတ်ပင်တဲ့ လုပ်ရပ်တခုလို့ ကျနော်မြင်တယ်။ မိုက်မဲတဲ့ လုပ်ရပ်တခုပေါ့နော်။”
မြန်မာ့ငလျင်ဘေးအခြေအနေနဲ့ပတ်သက်ပြီး နိုင်ငံခြားသတင်းထောက်တွေက သတင်းလာယူဖို့ ခွင့်တောင်းတာတွေ ရှိနေပေမဲ့ လက်ရှိ မြန်မာပြည်မှာ ရေ မီး၊ လျှပ်စစ်၊ တည်းခိုဖို့ ဟိုတယ်နဲ့ သွားလာနေထိုင်ရေး အခက်အခဲကြောင့် လာရောက်သတင်းယူခွင့်မပြုဘူးလို့ စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြောဆိုခဲ့တာ ဖြစ်ပါတယ်။
မြန်မာနိုင်ငံအလယ်ပိုင်း စစ်ကိုင်းမြို့ကို ဗဟိုပြုပြီး ရစ်ချ်တာစကေး ၇ ဒသမ ၇ ရှိ အင်အားပြင်း ငလျင်နဲ့ နောက်ဆက်တွဲငလျင် လှုပ်ခတ်မှုတွေကြောင့် နိုင်ငံတဝန်း သမိုင်းဝင်ဘာသာရေး အဆောက်အအုံတွေ၊ လမ်းတံတားတွေ၊ အပါအဝင် တိုက်တာအိုးအိမ်တွေ ပျက်စီးဆုံးရှုံးခဲ့ရပြီး လူသေဆုံး ထိခိုက်ဒဏ်ရာရမှုတွေ ဆက်လက်မြင့်တက်နေပါတယ်။
ဖူးအိအိနွယ်
