ငလျင်ဘေးဒဏ်သင့် ပြည်သူတွေအပေါ် လူသားချင်းစာနာထောက်ထားပြီး အမြန်ဆုံး ထောက်ပံ့ကူညီသွားမယ်လို့ ညီနောင်မဟာမိတ် တိုင်းရင်းသားလက်နက်ကိုင် ၃ ဖွဲ့က မတ် ၂၉ ရက်မှာ ထုတ်ပြန်ကြေညာလိုက်ပါတယ်။

ထုတ်ပြန်ချက်မှာတော့ အင်အားပြင်းငလျင် လှုပ်ခတ်မှုကြောင့် စစ်ကိုင်း၊ မန္တလေး၊ ရှမ်းပြည်နယ်၊ ပဲခူး၊ နေပြည်တော် အပါအဝင် နိုင်ငံရဲ့ နေရာတော်တော်များမှာ ပြည်သူလူထုတွေရဲ့ အသက်အိုးအိမ် ထိခိုက် သေဆုံး ပျက်စီးမှု၊ ဘုရားကျောင်းကန်စေတီပုထိုးတွေ၊ ဗလီတွေ အပါအဝင် သာသနိက အဆောက်အအုံတွေ၊ ရှေးဟောင်းယဉ်ကျေးမှု အမွေအနှစ်တွေ၊ ဟိုတယ်တွေ၊ လူနေတိုက်တာ အိုးအိမ်တွေ၊ အထပ်မြင့် အဆောက်အအုံတွေ၊ စာသင်ကျောင်းတွေနဲ့ ကျေးလက်ဆေးပေးခန်းတွေ စတဲ့ အဆောက်အအုံတွေ ပျက်စီး ဆုံးရှုံးခဲ့ရတယ်လို့ ဖော်ပြထားပါတယ်။

ဒီလိုမျိုး သဘာဝဘေးဒဏ်ကြောင့် ပြည်သူလူထုတွေရဲ့ အသက်အိုးအိမ် စည်းစိမ်နဲ့ အဆောက်အအုံများစွာ ပျက်စီး ဆုံးရှုံးခဲ့ရတဲ့အပေါ် ကာယကံရှင်မိသားစုများ၊ ဆွေမျိုးများနဲ့ ထပ်တူဝမ်းနည်းပြီး စိတ်မကောင်းဖြစ်ရတယ်လို့ ဆိုပါတယ်။

ဒါ့အပြင် မိုးလေဝသနဲ့ ဇလဗေဒ တိုင်းထွာချက်တွေအရ နောက်ဆက်တွဲငလျင်တွေ ထပ်မံဖြစ်ပေါ်လာဖွယ် ရှိနေတာကြောင့် ပြည်သူလူထုတွေအနေနဲ့ အထူးဂရုစိုက် သွားလာနေထိုင်ကြဖို့နဲ့ သတင်းမှန်တွေကို နားစွင့်ကြဖို့ကိုလည်း တိုက်တွန်းထားပါသေးတယ်။

ငလျင်ကြောင့် မြန်မာနိုင်ငံက ပြည်သူပေါင်း ၁,၀၀၀ ကျော် သေဆုံးခဲ့ရတယ်လို့ DVB ရဲ့ ​ဒေသတာအချက်အလက်အရ သိရပြီး ခုလက်ရှိအချိန်အထိ ဒေသအလိုက် ကူညီကယ်ဆယ်ရေးတွေ ဆောင်ရွက်နေကြဆဲပဲ ဖြစ်ပါတယ်။