နေပြည်တော်ကောင်စီနယ်မြေ ဒက္ခိဏသီရိမြို့ကို ဗဟိုပြုပြီး အင်အား ရစ်ချ်တာစကေး ၅ ဒသမ ၉ ရှိတဲ့ အင်အားအသင့်အတင့်ရှိတဲ့ မြေငလျင်တခု မတ် ၂၉ ရက် မြန်မာစံတော်ချိန် ညနေ ၃ နာရီ မိနစ် ၅၀ အချိန်မှာ ထပ်မံလှုပ်ခတ်ခဲ့ပါတယ်။
နေပြည်တော်မြေငလျင်စခန်းမှ အရှေ့တောင်ဘက် ၁၈ မိုင်ခန့် ကွာဝေးတဲ့ မြန်မာနိုင်ငံပြည်တွင်း ဧလာမြို့ အရှေ့တောင်ဘက် ၆ မိုင်ခန့်အကွာ အနက် ၁၀ ကီလိုမီတာကို ဗဟိုပြုပြီး မြေငလျင်လှုပ်သွားတာလို့ မိုးဇလက ထုတ်ပြန်ပါတယ်။
ဒီနေ့မနက် ၅ နာရီ၊ ၅၁ မိနစ်လောက်ကလည်း နေပြည်တော်မြေငလျင်စခန်းမှ မြောက်-အရှေ့မြောက်ဘက် ၁၃ မိုင်ခန့် ကွာဝေးတဲ့ မြန်မာနိုင်ငံပြည်တွင်း ပုဗ္ဗသီရိမြို့နယ် မြောက်-အရှေ့မြောက်ဘက် ၅ မိုင်ခန့်အကွာ အနက် ၁၀ ကီလိုမီတာကို ဗဟိုပြုပြီး အင်အားရစ်ချ်တာစကေး ၅ ဒသမ ၀ အဆင့်ရှိ မြေငလျင်လှုပ်သွားခဲ့ပါတယ်။
မတ် ၂၈ ရက် မနေ့မွန်းလွဲပိုင်းမှာ စစ်ကိုင်းမြို့အနီးကို ဗဟိုပြုပြီး အင်အား ၇ ဒသမ ၇ ရစ်ချ်တာစကေးရှိ အင်အားပြင်းငလျင် လှုပ်ခတ်ခဲ့တာကြောင့် နိုင်ငံတဝန်းမှာ သေဆုံးသူ အယောက် ၁၀၀၀ ကျော် အထိရှိလာပြီး အပျက်အစီးများပြားခဲ့တာပါ။
မနေ့မွန်းလွဲ ပိုင်းကစပြီး မတ်လ ၂၉ ရက် ညနေ ၄ နာရီ ဝန်းကျင်အထိ အင်အားရစ်ချ်တာစကေး ၇ဒသမ ၇ ကနေ ၁ ဒသမ ၇ အကြား ငလျင် ၈၃ ကြိမ် အထိလှုပ်ခတ်ခဲ့ပြီး ဖြစ်ပါတယ်။
နေပြည်တော်၊ ဇမ္ဗူသီရိမြို့နယ်၊ ပညာသိဒ္ဓိရပ်ကွက်၊ ခရေအိမ်ရာမှာ မနေ့က ငလျင်လှုပ်ခတ်မှုကြောင့် အဆောက်အဦပြိုကျပြီး ပိတ်မိနေသူတွေကို ဇမ္ဗူသီရိမြို့နယ် မီးသတ်စခန်းမှ ရှာဖွေကယ်ဆယ်ရေးတပ်ဖွဲ့ဝင်တွေနဲ့ သက်ဆိုင်ရာအဖွဲ့အစည်းတွေ ပူးပေါင်းပြီး ရှာဖွေကယ်ဆယ်ခဲ့ရာ သေဆုံးသူ အမျိုးသား ၂ ယောက်နဲ့ အမျိုးသမီး ၅ ယောက်တို့အား ရှာဖွေတွေ့ရှိခဲ့တယ်လို့ မြန်မာနိုင်ငံ မီးသတ်ဦးစီးဌာနက ဒီနေ့ညနေ ထုတ်ပြန်ပါတယ်။
