ငလျင်ဒဏ်ကြောင့် ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ အင်းလေးဒေသမှာ လူ အယောက် ၃၀ သေဆုံးပြီး အောင်ပန်းမြို့မှာတော့ ၃ ယောက် သေဆုံးတယ်လို့ ဒေသခံတွေထံက သိရပါတယ်။

မတ် ၂၈ ရက် နေ့လယ်က လှုပ်ခတ်ခဲ့တဲ့ အင်အားပြင်ငလျင်ကြောင့် ညောင်ရွှေမြို့နယ်၊ နန်းပန်မြို့ ကေလာရွာမှာ  ၂၅ ယောက်၊  ဟဲယားရွာမမှာ ၅ ယောက်နဲ့  အောင်ပန်းမြို့ ဟိုတယ်အောင်ပန်းပြိုကျမှုမှာ ၃ ယောက် သေဆုံးခဲ့တာ ဖြစ်ပါတယ်။

ဒေသခံရွာသားတယောက်က "အင်လေးမှာ တော်တော်ပြင်းပြင်းထန်ထန်ဖြစ်တယ်။ ငလျင်လှုပ်ပြီး ခရုတွေ ရေပေါ်အကုန်ပေါ်ပြီး အင်းလေးကန် အကုန်နောက်သွားတဲ့အထိ ဖြစ်တယ်။ ငလျင်လှုပ်တာ မီးလာချိန်လည်းဖြစ်တော့ သေဆုံးမှုအများဆုံးက ဓာတ်လိုက်ပြီးသေကြတာ။ အိမ်တွေလည်းအများကြီး ပျက်စီးသွားတယ်"လို့  ပြောပါတယ်။

လူသေဆုံးတဲ့အပြင် အင်းလေးဒေသ နန်းပန်မြို့နယ်ရှိ ကေလာရွာ၊ ဟဲယားရွာမရွာ၊ သလဲဦးရွာ၊ ဇရပ်ကြီးရွာရှိ နေအိမ် ၈၀ ရာခိုင်နှုန်းလည်း ပြိုကျတာ၊ စောင်းသွားတာ ဖြစ်ပြီးကလေးငယ် အပါအဝင် ပြည်သူ ၁၀၀ ကျော် ထိခိုက် ဒဏ်ရာရရှိ ပါတယ်။

လက်ရှိ ငလျင်ဘေးသင့်ဒေသမှာ သောက်သုံးရေ၊ စာနပ်ရိက္ခာ၊ လူသုံးကုန်နဲ့ ဆေးဝါးတွေ အရေးပေါ်အကူအညီလိုအပ်နေတယ်လို့  ကယ်ဆယ်ရေးအဖွဲ့ဝင်တယောက်က ပြောပါတယ်။

အောင်ပန်းမြို့မှာလည်း ဟိုတယ်အောင်ပန်းပြိုကျမှုကို ကယ်ဆယ်ရေးပြုလုပ်နေရဆဲဖြစ်ပြီး မတ် ၂၉ ရက် မနက်အထိတော့ အမျိုးသမီး ၃ ယောက်သေဆုံးခဲ့ရပြီး ဒဏ်ရာရသူ  ၂၅ ယောက်ကို ကယ်ထုတ်နိုင်တယ်လို့ အောင်ပန်းနာရေးကူညီမှုအသင်းရဲ့ Pageမှာ ကြေညာထားပေမဲ့ အသေစိတ်သိရှိရဖို့ ဖုန်းနဲ့ ထပ်မံဆက်သွယ်ပေမယ့် ဖုန်းလက်ခံဖြေဆိုတာမရှိပါဘူး။

ဒါ့အပြင် သမိုင်းဝင် အင်းလေးဖောင်တော်ဦးဘုရားရင်ပြင်၊ ဟဲယားရွာမဘုန်းကြီးကျောင်း၊ ရွှေကျွန်းမျှောဟိုတယ် ပျက်စီးခဲ့ပြီး သမိုင်းဝင် မောက်မယ်မြို့ မောက်စံကျောင်းရှိ သမိုင်းဝင်ဘုရားလေးဆူအနက် တဆူကထီးတော်မြေခခဲ့ရပြီး၊ ဟိုပုံးမြို့ သမိုင်းဝင်မွေတော် ဘုရားလည်း ထီးတော်မြေခခဲ့ရ ပါတယ်။

ရှမ်းပြည်နယ်တောင်ပိုင်းတောင်ကြီး၊ အောင်ပန်း၊ ကလော၊ ညောင်ရွှေ၊ ဆီဆိုင်၊ ပင်လောင်းမြို့နယ်တွေမှာ ငလျင်ကြောင့် အဆောက်အဦးများစွာ ပျက်စီးခဲ့ရပြီး  ကယ်ဆယ်ရေးလုပ်ငန်းလုပ်နေဆဲဖြစ်လို့ ထိခိုက်မှုတွေ အခုထက်ပိုနိုင်တယ်လို့ မြေပြင် ကယ်ဆယ်ရေးအဖွဲ့က ပြောပါတယ်။