မန္တလေးတိုင်း၊ တောင်သာမြို့နယ်ထဲက ကျေးရွာတွေကို စစ်ကောင်စီတပ်က မတ် ၂၄ ရက်၊ ည ၁ နာရီဝန်းကျင်မှာ လေယာဥ်နဲ့ဗုံးကြဲတိုက်ခိုက်ခဲ့လို့ နေအိမ်တချို့ပျက်စီးသွားပြီး ပြည်သူ့ကာကွယ်ရေးတပ်ဖွဲ့ဝင် တယောက် ကျဆုံးခဲ့တယ်လို့ တောင်သာအခြေစိုက်တော်လှန်ရေးတပ်ဖွဲ့တွေဆီကနေ သိရပါတယ်။

တောင်သာမြို့နယ် လူထုလှုပ်ရှားမှုကော်မတီရဲ့ တာဝန်ခံတယောက်က “တမံကြီးရွာနဲ့ မြေဖြူကုန်းတွေကို Y12 လေယာဥ်နဲ့ တရွာနဲ့တရွာကို မိနစ်ပိုင်းလောက်ခြားပြီး ဗုံးကြဲတိုက်ခိုက်ခဲ့တာပါ။ တမံကြီးနဲ့ မြေဖြူကုန်းရွာတွေက ကပ်နေတာ လှမ်းမြင်ရတဲ့ရွာတွေ” လို့ ပြောပါတယ်။

စစ်ကောင်စီတပ်ရဲ့ လေယာဥ်နဲ့ ဗုံးကြဲတိုက်ခိုက်ခံရတာကြောင့် အဆိုပါကျေးရွာတွေက နေအိမ် ၁၀ လုံးကျော် ပျက်စီးခဲ့သလို PDF ရဲဘော်တယောက်လည်း ကျဆုံးခဲ့တယ်လို့ ဆိုပါတယ်။

တောင်သာမြို့နယ် ပြည်သူ့ကာကွယ်ရေးအဖွဲ့ တာဝန်ခံ ကိုကြည်စတားက “ကျဆုံးသွားတဲ့ ရဲဘော်က အသက် ၂၀ လောက်ပဲ ရှိသေးတဲ့ ရပ်ကျေး ပကဖ ရဲဘော်တယောက်ပါ။ အဲ့ဒီရွာတွေမှာရှိတဲ့ ရွာခံတွေက စစ်ကြောင်း ခဏခဏထိုးလို့ ထွက်ပြေးနေကြတော့ ရွာလုံခြုံရေးအတွက် တာဝန်ယူပေးနေတဲ့ ရဲဘော်ဖြစ်ပါတယ်။ တမံကြီးရွာမှာ ကျသွားတာပါ။ စစ်တပ်က ပြည်သူပိုင်ပစ္စည်းကို ဖျက်ဆီးချင်စိတ်နဲ့ တိုက်ပွဲမရှိဘဲ ဗုံးကြဲသွားတာ” လို့ DVB ကို ပြောပါတယ်။

စစ်ကောင်စီတပ်ရဲ့ လေကြောင်းတိုက်ခိုက်မှုတွေကြောင့် အဆိုပါကျေးရွာတွေက ဒေသခံပြည်သူတွေဟာလည်း နေရပ်စွန့်ခွာထွက်ပြေးနေကြရတယ်လို့ သူကဆက်ပြောပါတယ်။

တောင်သာမြို့နယ်ထဲက ဒေသခံပြည်သူတွေအနေနဲ့လည်း တော်လှန်ရေးတပ်ဖွဲ့တွေက ထုတ်ပြန်တဲ့ လေကြောင်းရန်သတိပေး ထုတ်ပြန်ကြေညာချက်တွေကို စောင့်ကြည့်လိုက်နာပေးကြဖို့နဲ့ ရဟန်းသံဃာတော်တွေနဲ့ ပြည်သူအချင်းချင်းတွေကြားမှာလည်း စစ်တပ်ရဲ့ လေယာဥ်သံကြားရင် အချက်ပေးပြီး ကြိုတင်ရှောင်ရှားနိုင်မယ့်အစီအမံတွေကို အရေးပေါ်ပြုလုပ်ထားကြဖို့ ပြည်သူ့ကာကွယ်ရေးအဖွဲ့တွေက မေတ္တာရပ်ခံ​ထားတယ်လို့ ဆိုပါတယ်။

စစ်ကောင်စီထောက်ခံသူတွေကတော့ အဆိုပါကျေးရွာတွေမှာ ပြည်သူ့ကာကွယ်ရေးတပ်ဖွဲ့တွေ ခိုအောင်းနေတဲ့အတွက် လေကြောင်းတိုက်ခိုက်ခဲ့တာလို့ လူမှုကွန်ရက်တွေနဲ့ တယ်လီဂရမ်ချယ်နယ်တွေမှာ ရေးသားဖော်ပြနေကြပေမဲ့ DVB အနေနဲ့ သီးခြားအတည်မပြုနိုင်သေးပါဘူး။