အိန္ဒိယနိုင်ငံ၊ မီဇိုရမ်ပြည်နယ်၊ လောင်တလိုင်မြို့မှာ မတ် ၂၃ ရက် မနက်ပိုင်းက ကားတိမ်းမှောက်ပြီး ရခိုင်ကုန်သည်တယောက်နဲ့ အိန္ဒိယနိုင်ငံသား ကားဒရိုင်ဘာတယောက် သေဆုံးခဲ့ပြီး နောက်ထပ် ရခိုင်ကုန်သည်တယောက်လည်း ဒဏ်ရာအပြင်းအထန်ရရှိခဲ့တယ်လို့ ရခိုင်ကုန်သည်တွေက ပြောကြပါတယ်။
ရခိုင်ကုန်သည် ၂ ယောက်၊ အိန္ဒိယနိုင်ငံသား ကားသမား တယောက်တို့ဟာ ပလက်ဝနယ်စပ်ကနေ လောင်တလိုင်မြို့ဘက်ကို ကားနဲ့သွားကြရာမှာ လောင်တလိုင်မြို့အဝင် ၇၁ ဆောက်လုပ်ရေးဝင်း အနီးမှာ ကားမှောက်ပြီး ၂ ယောက်သေဆုံးကာ တယောက် ထိခိုက်ဒဏ်ရာရရှိခဲ့တာလို့ အိန္ဒိယနိုင်ငံကို ရောက်ရှိနေတဲ့ ရခိုင်ကုန်သည်တယောက်က ပြောပါတယ်။
“ကားမှောက်တာကတော့ မတ် ၂၃ ရက် မနက်ပိုင်း ၃ နာရီလောက်မှာ ပလက်ဝဘက်က လောင်တလိုက်ဘက်ကို အသွားမှာ လောင်တလိုင်မြို့အဝင်မှာ ကားချောက်ထဲကို ထိုးကျသွားတာ။ ရခိုင်ကုန်သည်တယောက်နဲ့ ကားသမားက အခင်းဖြစ်တဲ့ နေရာမှာတင်သေဆုံးသွားတာ။ နောက်ထပ် ကုန်သည်တယောက်ကတော့ ဒဏ်ရာအပြင်းအထန်ရရှိသွားပြီးတော့ ဆေးကုသမှု ခံယူနေကြရတယ်။”
ကားတိမ်းမှောက်မှုကြောင့် သေဆုံးသွားခဲ့တဲ့ ရခိုင်ကုန်သည်မှာ စစ်တွေမြို့က ကိုဆန်းနိုင် (၂၅ နှစ်) နဲ့ အိန္ဒိယနိုင်ငံသားတယောက်ဖြစ်ပြီး ထိခိုက်ဒဏ်ရာရရှိသွားသူမှာ ကျောက်တော်မြို့က ကိုဆိုင်းအောင် (၂၃ နှစ်) တို့ ဖြစ်ကြပါတယ်။
လက်ရှိမှာ သေဆုံးသွားသူ ကိုဆန်နိုင်ရဲ့ ရုပ်အလောင်းကို ရခိုင်ပြည်နယ်ကို ပြန်ပို့နိုင်ဖို့ လုပ်ဆောင်နေကြတယ်လို့ ကုန်သည်တွေဆီက သိရပါတယ်။
မီဇိုရမ်ပြည်နယ်ဟာ တောင်ပေါ်ဒေသတခု ဖြစ်တာကြောင့် မကြာခဏဆိုသလို ကားတိမ်းမှောက်မှုတွေ၊ ကုန်သည်တွေ ထိခိုက်ဒဏ်ရာရရှိမှုတွေရှိကြသလို ကုန်ပစ္စည်းတွေလည်း ထိခိုက်ပျက်စီးမှုတွေ ရှိကြတယ်လို့ သိရပါတယ်။
ရခိုင်မှာ တိုက်ပွဲဖြစ်ပွားပြီးနောက် ၂၀၂၃ ခုနှစ်ကတည်းက စစ်ကောင်စီက ရခိုင်ပြည်ကို ကုန်စီးဆင်းမှု ဖြတ်တောက်ထားပြီး ရခိုင်က ကုန်သည်တွေဟာ အိန္ဒိယနိုင်ငံ မီဇိုရမ်ပြည်နယ်ဘက်က ကုန်စည်တွေကို ကုန်သွယ်နေကြတာလည်း ဖြစ်ပါတယ်။
