ထိုင်း-မြန်မာနယ်စပ် မဲဆောက်မြို့မှာ မြန်မာနိုင်ငံဘက်ကို ပို့မယ့် StarLink ဂြိုဟ်တု အင်တာနက် စက် ၃၈ လုံးနဲ့ ဆက်စပ်ပြီး တရုတ်နိုင်ငံသားတယောက်ကို ထိုင်းရဲနဲ့ စစ်တပ် ပူးပေါင်းတပ်ဖွဲ့တို့က ဖမ်းမိခဲ့တယ်လို့ ထိုင်းသတင်းတွေမှာ ဖော်ပြပါတယ်။

မတ် ၂၂ ရက်က ထိုင်းမူးယစ်ဆေးဝါးတားဆီးနှိမ်နင်းရေးတပ်ဖွဲ့၊ ရဲတပ်ဖွဲ့တို့နဲ့ ရတ်ချာမန်နု အထူးတပ်ဖွဲ့တွေ ပူးပေါင်းပါဝင်တဲ့အဖွဲ့ဟာ တာ့ခ်ခရိုင်ကနေ မဲဆောက်မြို့နယ်ထဲ ဝင်ရောက်လာတဲ့ မသင်္ကာဖွယ် အဖြူရောင် အီဆူဇူးပစ်ကပ်ထရပ်ကားတစီးကို စစ်ဆေးခဲ့ချိန်မှာ ဖမ်းမိခဲ့တာလို့ ဆိုပါတယ်။

အဆိုပါယာဉ်ကိုတော့ လျူဟောင်ယု အမည်ရတဲ့ တရုတ်နိုင်ငံသားတယောက်က မောင်းနှင်လာခဲ့ တာဖြစ်ပြီး အာဏာပိုင်တွေက စစ်ဆေးချိန်မှာတော့ Makro နဲ့ Shopee အမှတ်တံဆိပ် စတစ်ကာတွေ ကပ်ထားတဲ့ ပုံးတွေကို တွေ့ရှိခဲ့ကြရပြီး အတွင်းမှာတော့ StarLink ဂြိုဟ်တု အင်တာနက်စက်တွေကို စစ်ဆေးတွေ့ရှိခဲ့တာလို့ ဆိုပါတယ်။

မစ္စတာလျူကတော့ အဆိုပါပစ္စည်းတွေကို ချင်းမိုင်ကနေ တာ့ခ်ခရိုင်၊ မဲဆောက်ဆီ ပို့ဆောင်ဖို့ စုဆောင်းထားကြောင်း ပြောကြားခဲ့ပေမဲ့ ထိုင်းရဲတပ်ဖွဲ့တာဝန်ရှိသူတွေကတော့ ဒါတွေဟာ ကရင်ပြည်နယ် မြဝတီမြို့နယ်ထဲက ကျားဖြန့်အွန်လိုင်းရာဇဝတ်ဂိုဏ်းတခုအတွက် ခိုးသွင်းဖို့ ရည်ရွယ်တယ်လို့ ယုံကြည်နေကြတာပါ။

လတ်တလောမှာတော့ ရတ်ချာမန်နု အထူးတပ်ဖွဲ့က အဆိုပါပစ္စည်းတွေကို သိမ်းဆည်းထားပြီး သူ့ကို ဖမ်းဆီးကာ ဥပဒေအရ လိုအပ်တဲ့ စုံစမ်းစစ်ဆေးမှုတွေ ဆက်လက်လုပ်ဆောင်ဖို့ ရဲစခန်းဆီ လွှဲပြောင်းထားတယ်လို့ သတင်းမှာ ဖော်ပြပါတယ်။

မတ် ၁၁ ရက်မှာလည်း ထိုင်းလုံခြုံရေးတပ်ဖွဲ့ဝင်တွေက အလားတူ ကျားဖြန့် အွန်လိုင်းငွေလိမ်ဂိုဏ်းတွေမှာ အသုံးပြုမယ်လို့ ယူဆရတဲ့ အင်တာနက် ဆက်သွယ်ရေးပစ္စည်းတွေကို ကြားဖြတ်ဖမ်းဆီးနိုင်ခဲ့ပြီး မြန်မာဘက်ခြမ်း ဘုရားသုံးဆူဒေသဆီ နယ်စပ်ဖြတ် ကျော်ခိုးသွင်းမှာကို တားဆီးနိုင်ခဲ့တယ်လို့ ဆိုပါတယ်။

သက်ဆိုင်ရာ အာဏာပိုင်တွေဟာ Starlink ဂြိုဟ်တုအင်တာနက်စက် ၂၁ လုံးနဲ့ ပရင်တာ ၄ လုံးတို့နဲ့အတူ ငွေလိမ်လုပ်ငန်းတွေမှာ အသုံးပြုမယ့် ဆက်စပ်ပစ္စည်းတွေကိုပါ ဖမ်းမိခဲ့တာလို့ ဆိုပါတယ်။

ဖေဖော်ဝါရီ ၅ ရက်က စတင်ကာ မြန်မာနိုင်ငံဘက်က ကျားဖြန့်အွန်လိုင်းငွေလိမ်ဂိုဏ်းတွေကို တိုက်ဖျက်ရေးအတွက် ထိုင်းနိုင်ငံဘက်ကနေ နယ်စပ်ဒေသတွေဆီ လျှပ်စစ်မီးနဲ့ အင်တာနက် ဝန်ဆောင်မှုတွေကို ဖြတ်တောက်ခဲ့ပြီးနောက်မှာ ဆိုက်ဘာရာဇ၀တ်မှုတွေ သိသိသာသာ ကျဆင်းသွားခဲ့သလို ကျားဖြန့်ငွေလိမ်ဂိုဏ်းတွေရဲ့ လိမ်လည်မှု ၂၀ ရာခိုင်နှုန်း ကျဆင်းသွားကာ ဆုံးရှုံးမှု ဘတ်သန်း ၂၀၀ ကျဆင်းသွားတဲ့အကြောင်းလည်း သတင်းမှာ ဖော်ပြပါတယ်။

Source: Dailystar/ TheThaiger