ဧရာဝတီတိုင်း၊ မအူပင်မြို့နယ်မှာ စစ်ကောင်စီတပ်က စစ်မှုထမ်းဖို့အတွက်ဆိုပြီး လူငယ်တွေကို နေအိမ်တွေအထိ အတင်းဝင်ရောက် ဖမ်းဆီးခဲ့တယ်လို့ ဒေသခံတွေဆီက သိရပါတယ်။

မအူပင်မြို့ အမှတ် ၁ ရပ်ကွက် အပါအဝင် ရပ်ကွက်တချို့က လူငယ် ၁၁ ယောက်ကို စစ်ကောင်စီတပ်နဲ့ အရပ်ဝတ်လူတချို့က မတ် ၂၂ ရက်နဲ့ ၂၃ ရက်တွေမှာ ဖမ်းဆီးခဲ့တာလို့ ဆိုပါတယ်။

မအူပင်မြို့ခံတယောက်က “တုတ်တွေ၊ သေနတ်တွေနဲ့ လာပြီး စစ်ကောင်စီတပ်က အတင်းဖမ်းခဲ့တာ။ အိမ်တွေအထိလာပြီး အတင်းဝိုင်းချုပ်ပြီး ဖမ်းသွားတာ။ သူခိုးဓားပြတောင် ဒီလိုပုံစံနဲ့ ဖမ်းခေါ် ခံရတာမျိုး မရှိဘူး။ စစ်မှုထမ်းအတွက် အဖမ်းခံခဲ့ရတာ” လို့ ပြောပါတယ်။

အဖမ်းခံရတဲ့သူတွေဟာ အသက် ၁၇ နှစ်အရွယ် ၄ ယောက်နဲ့ အသက် ၂၀ ကျော်အရွယ် လူငယ် ၇ ယောက်ဖြစ်ပြီး အဖမ်းခံရသူတွေနဲ့ မိသားစုတွေဟာ မတ် ၂၄ ရက်အထိ အဆက်အသွယ် မရသေးဘူးလို့ ဆိုပါတယ်။

စစ်ကောင်စီတပ်နဲ့ နီးစပ်သူက “အဖမ်းခံရသူတွေအကုန် မအူပင် ခလရ ၂၇ မှာ ချုပ်ထားတယ်လို့ သိရတယ်။ စစ်မှုထမ်းအတွက် ဖမ်းတာလား၊ ဘာအတွက်နဲ့ ဖမ်းတာလဲတော့ မသိသေးပါဘူး” လို့ ပြောပါတယ်။

စစ်ကောင်စီတပ်က မအူပင်မြို့နယ်မှာ လူငယ်တွေကို ရက်ဆက် ဖမ်းဆီးနေတာအပြင် ဧည့်စာရင်းတွေ တင်းတင်းကျပ်ကျပ် စစ်ဆေးတာ၊ အာရက္ခတပ်တော် (AA)၊ ပြည်သူ့ကာကွယ်ရေးတပ် (PDF) တွေရဲ့ သတင်းရရင် အုပ်ချုပ်ရေးအဖွဲ့ကို ဆက်သွယ်ပြောဆိုပေးဖို့၊ PDF တွေ လက်မခံဖို့နဲ့ လက်ခံတာကို စစ်ဆေးတွေ့ရှိရင် ဖမ်းဆီးပြီး အရေးယူလို့ ရတယ်ဆိုပြီး ခြိမ်းခြောက်ပြောဆိုခဲ့တယ်လို့ သိရပါတယ်။