စစ်ကိုင်းတိုင်း၊ ရေဦးမြို့၊ ရွှေပြည်သာရပ်ကွက် ဓမ္မာရုံရှေ့မှာ စစ်ဆေးရေးလုပ်နေတဲ့ စစ်ကောင်စီတပ်သားတွေကို မတ် ၂၃ ရက် နေ့ခင်း ၁ နာရီခွဲက ဒရုန်းယာဉ်အသုံးပြုပြီး ဗုံးကြဲ တိုက်ခိုက်ခဲ့တယ်လို့ ရေဦးပြည်သူ့ကာကွယ်ရေးတပ်ဖွဲ့ထံကနေ သိရပါတယ်။
အခုတိုက်ခိုက်မှုကို ရေဦးမြို့နယ် ပြည်သူ့ကာကွယ်ရေးအဖွဲ့က တိုက်ခိုက်ခဲ့တာလို့လည်း သိရပါတယ်။
ရေဦးမြို့နယ် ပြည်သူ့ကာကွယ်ရေးအဖွဲ့ တာဝန်ရှိသူ ကိုပြည့်ကြီးက “ကျနော်တို့ ဒရုန်းနဲ့ ဗုံးသီး ၃ လုံး ကြဲချ တိုက်ခိုက်ခဲ့တာ။ အဲ့နေရာကနေ စစ်တပ်က နယ်ဘက်က ကားတွေ၊ ဈေးဝယ်လာသူတွေကို ပုံမှန် နေ့စဥ် စစ်ဆေးငွေညှစ်နေတာ။ အဲကောင်တွေကို ကျနော်တို့ သွားပြီး ဒရုန်းယာဉ်နဲ့ ဗုံးသီးကြဲချခဲ့တာ။ ညနေပိုင်းရောက်တော့ ကျနော်တို့ မြို့ထဲက စစ်တပ်အတွင်းက ဖရဲသီးကို လှမ်းဖုန်းဆက်တဲ့အခါ စစ်ကောင်စီတပ်သား ၃ ဦး သေဆုံးပြီး ၂ ဦး ထိခိုက်ဒဏ်ရာ ရရှိခဲ့တယ်လို့ သိထားရတယ်။ ကျနော်တို့ အဲလို သွားတိုက်ခိုက်လို့ စစ်တပ်ဘက်က လက်နက်ကြီးနဲ့ ရမ်းသန်းပြီး ကောင်တာပြန်တာတွေလည်း ရှိခဲ့တယ်။ သူတို့ပြန်ပစ်တဲ့နေရာနဲ့ ကျနော်တို့ရှိတဲ့နေရာနဲ့ တခြားစီဖြစ်လို့ ကျနော်တို့ဘက်က အထိအခိုက်မရှိခဲ့ဘူး” လို့ ပြောပါတယ်။
ရေဦးမြို့အတွင်းမှာ စစ်တပ်က အရပ်သား အိမ်စီးကားတွေနဲ့ ကင်းလှည့်နေသလို မြို့ဝင်၊ မြို့ထွက် ဝင်ပေါက်ဂိတ်တွေမှာလည်း အထိုင်ချ စစ်ဆေးတာတွေ ပြင်းပြင်းထန်ထန် ပြုလုပ်နေတယ်လို့လည်း မြို့ပေါ်နေ ပြည်သူတွေက ပြောပါတယ်။
ရေဦးမြို့နေ ပြည်သူတယောက်က “အခု ဒရုန်းယာဉ်နဲ့ ဗုံးသီးချတဲ့နေရာက ကျနော်တို့ရပ်ကွက်နဲ့တော့ ဝေးတယ်။ အဲစစ်ဆေးရေးဂိတ်က ရေဦးမြို့မြောက်ပိုင်း ရွှေပြည်သာရပ်ကွက်ထဲ ရှိတာလေ။ သူတို့ အဲဒီ စစ်ဆေးရေးဂိတ်က ပုံမှန် နေ့တိုင်းလိုလို ရဲစခန်းကနေ မနက်ခင်း ၇ နာရီကနေ ညနေ ၆ နာရီလောက်အထိ စစ်ဆေးရေးဂိတ် လုပ်တာပေါ့။ စစ်သားအင်အားကတော့ ရဲရော အပါအဝင်ဆို ၁၅ ယောက်နဲ့ ၂၀ ကြားမှာ ရှိမယ်ဗျ။ အဲဒါတောင် ပျူစောထီးတွေ ပါသေးတယ်။ ဗုံးသီးချ တိုက်ခိုက်ခံရတယ်လို့တော့ အသိတွေကပြောတယ်။ အသေးစိတ်တော့ မသိရဘူး” လို့ ပြောပါတယ်။
ရေဦးမြို့အတွင်း စစ်တပ်က ရဲစခန်း အပါဝင် ထွေအုပ်ရုံး၊ အထကကျောင်းနဲ့ မြို့ဝင်၊ မြို့ထွက်မှာ အထိုင်စခန်းတွေ ပြုလုပ်ပြီး ဒေသခံပြည်သူတွေကို ဖမ်းဆီးကာ ငွေကြေးတောင်းခံကာ ငွေကြေးမပေးနိုင်သူတွေကို စစ်မှုထမ်းခိုင်းပြီး ငွေကြေးပေးနိုင်သူတွေကို ပြန်လွှတ်ပေးတာတွေလည်း ရှိနေတယ်လို့ သိရပါတယ်။
