စစ်ကိုင်းတိုင်း၊ ကလေးမြို့ကနေ မြန်မာပြည်အောက်ပိုင်းဘက်ကို ပြေးဆွဲပေးနေတဲ့ ကလေး-မန္တလေး-ရန်ကုန် မြန်မာ့လေကြောင်း လေယာဉ်လက်မှတ်ဈေးဟာ ကျပ် ၂၀,၀၀၀ ဝန်းကျင် မြင့်တက်သွားတယ်လို့ လေယာဉ်လက်မှတ်အရောင်းကိုယ်စားလှယ်တွေဆီက သိရပါတယ်။
မတ် ၂၀ ရက်ကစလို့ ဈေးနှုန်းပြောင်းလဲသွားတာဖြစ်ပြီး အရင်က ကလေး-ရန်ကုန် လေယာဉ်လက်မှတ်ဈေး ၄၉၀,၀၀၀ ကျပ်ကနေ ၅၁၀,၀၀၀ ကျပ်၊ ရန်ကုန်-ကလေး လေယာဉ်လက်မှတ်ဟာ ၄၃၀,၀၀၀ ကျပ်ကနေ ၄၅၀,၀၀၀ ကျပ်၊ ကလေး-မန္တလေး လေယာဉ်လက်မှတ်ဈေးကတော့ ကျပ် ၁၅,၀၀၀ အထိ မြင့်တက်လာလို့ အသွား ၃၃၀,၀၀၀ ကျပ်နဲ့ အပြန်က ၃၂၀,၀၀၀ ကျပ် ဖြစ်လာပါတယ်။
မင်္ဂလာလေကြောင်းလိုင်းလည်း မကြာမီ ဈေးတက်နိုင်သလို ခရီးသွားသူများတဲ့အတွက် ရှေ့ ၂ ပတ်လောက်အထိ လေယာဉ်ခုံအပြည့်ရောင်းထားပြီးဖြစ်တယ်လို့ ကလေးမြို့က လေယာဉ်လက်မှတ် အရောင်းဝန်ထမ်းတယောက်က ပြောပါတယ်။
လေယာဉ်လက်မှတ်ခတွေဈေးမြင့်တက်ပေမဲ့ ကုန်းလမ်းကြောင်းက စစ်ဆေးရေးဂိတ်တွေနဲ့ ခရီးကြန့်ကြာတဲ့အတွက် လေကြောင်းခရီးကိုပဲ ဆက်လက်အသုံးပြုရဦးမယ်လို့ ကလေးဒေသခံ တယောက်က ပြောပါတယ်။
ကလေးမြို့ကနေ မြန်မာပြည်အောက်ပိုင်းဘက်ကိုသွားဖို့ဆိုရင် ကုန်းလမ်းကြောင်းက တိုက်ပွဲတွေနဲ့ လမ်းကြောပိတ်ဆို့တာတွေကြောင့် လေကြောင်းခရီးကိုပဲ ဒေသခံတွေက အဓိကထား အသုံးပြုနေကြရတာပါ။
၂၀၂၄ ခုနှစ် ဩဂုတ် ၁၃ ရက်နေ့ကလည်း ကလေးမြို့ကနေ မြန်မာပြည်အောက်ပိုင်းဘက် ထွက်ခွာတဲ့ လေယာဉ်လက်မှတ်ဈေးနှုန်းဟာ ၃၀,၀၀၀ ဝန်းကျင်ဈေးတက်ခဲ့ပါသေးတယ်။
လေကြောင်းလိုင်းနဲ့ ကလေးမြို့ကနေ မုံရွာ၊ မန္တလေး၊ ရန်ကုန်မြို့တို့ကိုပြေးဆွဲပေးနေပြီး အရင်က မြန်မာ့လေကြောင်းလိုင်း၊ ကမ္ဘောဇလေကြောင်းလိုင်းနဲ့ အဲသံလွင်လေကြောင်းလိုင်းတို့ ပြေးဆွဲခဲ့ရာကနေ အခုအခါမှာတော့ မင်္ဂလာ(ကမ္ဘောဇ)လေကြောင်းလိုင်းနဲ့ မြန်မာ့လေကြောင်းလိုင်းတို့ပဲ ပြေးဆွဲတော့တာဖြစ်ပါတယ်။
