မန္တလေး၊ ပြည်ကြီးတံခွန်မြို့နယ်မှာ ငွေကျပ် သန်း ၂,၂၀၀ ကျော်တန်ဖိုးရှိတဲ့ စိတ်ကြွရူးသွပ်ဆေးပြား ၁၅ သိန်းကျော် ဖမ်းဆီးရမိတယ်လို့ စစ်ကောင်စီရဲ့ မူးယစ်ဆေးဝါးထိန်းချုပ်ရေးဗဟိုအဖွဲ့(CCDAC)က မတ် ၂၂ ရက်မှာ ထုတ်ပြန်ပါတယ်။

မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့ဝင်တွေ ပါတဲ့ ပူးပေါင်းအဖွဲ့ဟာ မတ် ၁၄ ရက် ညနေ ၄ နာရီခွဲအချိန်က မန္တလေး၊ ပြည်ကြီးတံခွန်မြို့နယ်၊ ၁၃၄ လမ်းနဲ့ ၇၈ လမ်းထောင့်မှာ အောင်နိုင်ထွေး (ခ) ဖိုးသား မောင်းနှင်ပြီး ရဲလင်းဖြိုး လိုက်ပါလာတဲ့ Nissan ၁၂ ဘီးကားနဲ့ နန်းလင်း မောင်းနှင်ပြီး ရဲဝင်းထက် လိုက်ပါလာသည့် Nissan ၁၂ ဘီးကားတို့ကို သတင်းအရရှာဖွေရာမှာ ကုန်ပစ္စည်းတွေနဲ့ ဖုံးအုပ်သယ်ဆောင်လာတဲ့ စိတ်ကြွရူးသွပ်ဆေးပြား ၁၀ ဒသမ ၁ သိန်း သိမ်းဆည်းရမိခဲ့တယ်လို့ ဆိုပါတယ်။

စိတ်ကြွရူးသွပ်ဆေးပြားတွေသယ်ဆောင်ရာမှာ ပူးပေါင်းပါဝင်သူတွေဖြစ်တဲ့ စိုးသီဟနဲ့ အောင်ဖြိုးကိုတို့ကို အမရပူရမြို့နယ်၊ စွယ်တော်ကားဝင်းမှာ အဲဒီနေ့ ည ၁၁ ခွဲက ဖမ်းဆီးရမိခဲ့ပြီး မတ် ၁၅ ရက် မနက် ၁ နာရီအချိန်မှာ ပြည်ကြီးတံခွန်မြို့နယ်၊ စက်မှုကွက်သစ်၊ ၁၄၀ (B)လမ်းက နေအိမ်မှာ သူတို့ဖွက်ထားတဲ့ စိတ်ကြွရူးသွပ်ဆေးပြား ၅ သိန်းကို ထပ်မံသိမ်းဆည်းရမိခဲ့တယ်လို့ ဆိုပါတယ်။

ဒါကြောင့် စုစုပေါင်းဒေသကာလတန်ဖိုးငွေကျပ် သန်းပေါင်း ၂,၂၀၀ ကျော်တန်ဖိုးရှိတဲ့ စိတ်ကြွရူးသွပ်ဆေးပြား ၁၅ ဒသမ ၁ သိန်း သိမ်းဆည်းရမိခဲ့တယ်လို့ CCDAC က ဖော်ပြထားပါတယ်။

စစ်ဆေးဖော်ထုတ်ချက်အရ စိတ်ကြွရူးသွပ်ဆေးပြားတွေကို အမရပူရမြို့နယ်ကနေ စစ်ကိုင်းတိုင်း၊ ကလေးမြို့ကို သယ်ဆောင်ဖို့ စေခိုင်းသူ ဇော်မင်းထွန်း (ခ) ကိုဇော် (ခ) ပုံတူ ကို ကလေးမြို့၊ ပင်လုံရပ်ကွက်က သူရဲ့ အိမ်မှာ မတ် ၁၅ ရက် မနက် ၆ နာရီခွဲက ဆက်လက်ဖမ်းဆီးရမိခဲ့ပြီး စစ်ဆေးဖော်ထုတ်ချက်တွေအရ သိမ်းဆည်းရမိတဲ့ စိတ်ကြွဆေးပြားတွေကို ရှမ်းပြည်နယ်ကနေ စစ်ကိုင်းတိုင်းကို သယ်ဆောင်ရောင်းဝယ်တာလို့ သိရှိရတာကြောင့် သူတို့ကို မူးယစ်ဆေးဝါးနဲ့ စိတ်ကိုပြောင်းလဲစေတဲ့ဆေးဝါးများ ဆိုင်ရာဥပဒေအရ အရေးယူထားပြီး ကွင်းဆက်ပြစ်မှုကျူးလွန်သူတွေကိုလည်း ဆက်လက်ဖော်ထုတ်နေတယ်လို့ ဆိုပါတယ်။

ရန်ကုန်တိုင်းထဲမှာ ငွေကျပ်သန်းပေါင်း ၉၆,၀၀၀ ကျော်တန်ဖိုးရှိတဲ့ အိုက်စ်နဲ့ ကက်တမင်းတွေ ဖမ်းဆီးရမိတယ်လို့ CCDAC က မတ် ၁၈ ရက်မှာ ထုတ်ပြန်ထားပြီး ပဲခူးတိုင်း၊ ဝေါမြို့နယ်မှာလည်း ငွေကျပ်သန်းပေါင်း ၃,၇၀၀ တန်ဖိုးရှိတဲ့ စိတ်ကြွရူးသွပ်ဆေးပြားတွေ ဖမ်းဆီးရမိတယ်လို့ မတ် ၁၆ ရက်က ထုတ်ပြန်ထားပါတယ်။