တနင်္သာရီတိုင်း၊ တနင်္သာရီမြို့နယ်မှာ စစ်ကောင်စီတပ်က ကုန်တင်ကားတွေကို ကျေးရွာတွေဘက် ကုန်သယ်ခွင့်မပေးတော့ဘဲ ဖြတ်တောက်ထားတာကြောင့် ကုန်ပစ္စည်းဝယ်မရဘဲ ပြတ်လပ်နေတယ်လို့ ဒေသခံပြည်သူတွေဆီက သိရပါတယ်။
တော်လှန်ရေးတပ်ဖွဲ့တွေ အားကောင်းပြီး ထိတွေ့တိုက်ပွဲတွေ မကြာခဏဖြစ်နေတဲ့ တနင်္သာရီမြို့နယ်ကို စစ်ကောင်စီက ကုန်ကားတွေ သယ်ယူခွင့်မပေးတော့တာ တပတ်ကျော်ကြာမြင့်ပြီ ဖြစ်ပါတယ်။
ကုန်ကားမရောက်တာ တပတ်ကျော်ကြာပြီဖြစ်တာကြောင့် အဓိကစားသောက်ကုန်တွေဖြစ်တဲ့ ဆန်၊ ဆီ၊ ဆား အစသဖြင့် ကုန်ပစ္စည်းတွေ ပြတ်လပ်နေတယ်လို့ မော်တုန်းကျေးရွာရှိ ကုန်ပစ္စည်းရောင်းသူတယောက်က ပြောပါတယ်။
“ဒီဘက်ကို စစ်တပ်က ကုန်တွေဖြတ်လိုက်ပြီ။ ဘယ်ကား၊ ဘယ်ပစ္စည်းမှ တင်ခွင့်မပေးဘဲ ဖြတ်တောက်ထားတာ တပတ်ကျော်ကြာပြီ။ ပစ္စည်းဝင်ပေါက် မရှိတော့ဘူး။ ပစ္စည်းတင်ခွင့် မရတာ နည်းနည်းကြာပြီဆိုတေ့ အဓိက စားသောက်ကုန်တွေ တော်တော်များများပြတ်နေတယ်၊ အချိန်ကြာလာရင်တော့ ဆိုင်ပိတ်မှရတော့မယ်။”
တနင်္သာရီမြို့နယ်မှာ ရောင်းဝယ်တဲ့ ကုန်ပစ္စည်းတွေဟာ မြိတ်မြို့ကနေ အဓိကမှာယူတာဖြစ်ပြီး ကုန်ကားတွေကို တနင်္သာရီမြို့ပေါ်အထိသာ တင်ဆောင်ခွင့်ပေးထားကာ ကျေးရွာတွေကနေ ဆိုင်ကယ်တွေနဲ့ သွားရောက်ဝယ်ယူရပြီး အကန့်အသတ်နဲ့သာ သယ်ယူခွင့်ရတယ်လို့ ဒေသခံတယောက်က ပြောပါတယ်။
“မြို့ပေါ်မှာက အရှေ့ဘက်ရွာတွေက လူတွေပဲ သွားဝယ်လို့ ရတယ်လေ။ မော်တုန်းဒေသခံတွေဆို မြို့ပေါ်တက်ပြီး ဘယ်လိုမှ သွားဝယ်မရဲဘူး။ သွားဝယ်ရင်လည်း ပစ္စည်းက လိုသလောက်မရဘူး၊ တကူကလည်း ဒီဘက်ကကုန်တွေကို ပြန်သယ်နေရတာ။ အခုလို ပိတ်လိုက်တော့ သူတို့ပါ ပစ္စည်းပြတ်ပြီလေ။”
အာဏာသိမ်းပြီးနောက်ပိုင်းမှာ မော်တုန်းကျေးရွာအုပ်စုနဲ့ တကူကျေးရွာအုပ်စုတို့ကို စစ်ကောင်စီတပ်က တော်လှန်ရေးတပ်ဖွဲ့တွေနဲ့ ပတ်သက်ဆက်နွှယ်လို့ဆိုပြီး အရင်ကလည်း ရိက္ခာတွေ ဖြတ်တောက်လေ့ရှိတယ်လို့ ဒေသခံတွေက ပြောပါတယ်။
ထိတွေ့တိုက်ပွဲတွေကြောင့်လည်း တနင်္သာရီမြို့နယ်ထဲမှာ ကျေးရွာအုပ်စု အများအပြားက စစ်ဘေးရှောင်ပြည်သူ ထောင်နဲ့ချီရှိပြီးတော့ စားနပ်ရိက္ခာနဲ့ဆေးဝါးတွေ လိုအပ်နေတယ်လို့ သိရပါတယ်။
တနင်္သာရီမြို့နယ် သိန်ခွန်းကျေးရွာဘက်မှာ တိုက်ပွဲဖြစ်နေတာ ၃ လကျော်ရှိပြီးဖြစ်ကာ စစ်ကောင်စီ ဘက်က ကုန်းကြောင်း၊ လေကြောင်း အသုံးပြုတိုက်ခိုက်နေပေမဲ့ တော်လှန်ရေး ပူးပေါင်းတပ်ဖွဲ့တွေဘက်က ပြန်လည်ခုခံတိုက်ခိုက်နေတာကြောင့် စစ်ရေးတင်းမာနေတယ်လို့ သိရပါတယ်။
