ရခိုင်ပြည်နယ်၊ ကျောက်ဖြူမြို့နယ်မှာ မတ် ၁၆ ရက်နဲ့ ၁၇ ရက်နေ့တွေက စစ်ကောင်စီတပ်နဲ့ အာရက္ခတပ်တော် (AA) တို့ တိုက်ပွဲပြင်းထန်နေပြီး စစ်ကောင်စီတပ်သားတချို့ ဖမ်းဆီးရမိခဲ့တယ်လို့ AA နဲ့ နီးစပ်သူတွေဆီကနေ သိရပါတယ်။
ကျောက်ဖြူမြို့နယ်အခြေစိုက် ရဲတပ်ရင်း ၃၂ အနီးနဲ့ ရှောက်ချောင်းနဲ့ စည်မော်ရွာကြားက တောင်တန်းတွေမှာ မတ် ၁၆ ရက် ညပိုင်းကနေ ၁၇ ရက်အထိ တိုက်ပွဲတွေဖြစ်နေတာပါ။ အဲဒီတိုက်ပွဲအတွင်းမှာ စစ်ကောင်စီတပ်ဖွဲ့ဝင်တချို့ ထိခိုက်သေဆုံးသူရှိနိုင်ပြီး တချို့ကိုတော့ ဖမ်းဆီးရမိခဲ့တယ်လို့ AA နဲ့ နီးစပ်သူက ဆိုပါတယ်။
စစ်ကောင်စီဘက်က အတွဲလိုက်ဒုံးတွေ၊ ဒရုန်းတွေနဲ့ တိုက်ခိုက်သလို AA ဘက်ကလည်း လက်နက်ကြီး၊ လက်နက်ငယ်တွေ ဒရုန်းတွေနဲ့ အပြန်အလှန်တိုက်ခိုက်ခဲ့ကြတာဖြစ်ပြီး ပစ်ခတ်သံတွေ ဆက်တိုက်ကြားရတယ်လို့ ဒေသခံက ပြောပါတယ်။
ကျောက်ဖြူမြို့နယ်မှာ တိုက်ပွဲတွေ ပြင်းထန်နေလို့ အရပ်သားပြည်သူ ၂၀၀၀၀ ကျော်လောက် ဘေးလွတ်ရာကို ထွက်ပြေးတိမ်းရှောင်နေရကာ လူသားချင်းစာနာမှု အကူအညီတွေ အရေးပေါ် လိုအပ်နေပါတယ်။
