ပိတ်ဆို့အရေးယူတာတွေဟာ ချက်ချင်းမဖြစ်နိုင်ပေမဲ့ မြန်မာနိုင်ငံအပေါ် ဒေသတွင်း ဖိအားပေးမှုတွေဟာ ပြည်တွင်းမှာဖြစ်နေတဲ့ တိုက်ပွဲတွေကို ရပ်တန့်ရေးအတွက် ကူညီနိုင်မှာဖြစ်ပြီး ဒါဟာ ဘင်္ဂလားဒေ့ရှ်နိုင်ငံက ရိုဟင်ဂျာဒုက္ခသည်တွေ ဘေးကင်းပြီး ဂုဏ်သိက္ခာရှိရှိ နေရပ်ပြန်နိုင်ရေး လမ်းခင်းပေးနိုင်မယ်လို့ ကုလသမဂ္ဂအတွင်းရေးမှူးချုပ်က မတ် ၁၅ ရက်မှာ ပြောပါတယ်။
ဘင်္ဂလားဒေ့ရှ်နိုင်ငံ ကော့ဇ်ဘဇားမြို့ဆီ သမိုင်းဝင်ခရီးစဉ်နဲ့ ရမ်မဒန်ဥပုသ်လ ဝါဖြေညစာစားပွဲကို တက်ရောက်ပြီးတဲ့နောက် ဘင်္ဂလားဒေ့ရှ် နိုင်ငံခြားရေးဝန်ကြီးနဲ့ ပူးတွဲသတင်းစာရှင်းလင်းပွဲမှာ အန်တိုနီယို ဂူတာရက်စ်က ပြောလိုက်တာပါ။
ဘင်္ဂလားဒေ့ရှ် အရှေ့တောင်ပိုင်းက ဆိုးရွားတဲ့အခြေအနေတွေမှာ နေထိုင်တဲ့ ဒုက္ခသည်တွေအတွက် ရန်ပုံငွေပိုလိုတယ်လို့လည်း ကုလသမဂ္ဂ အကြီးအကဲက ထပ်ပြောပါတယ်။
ရခိုင်ပြည်နယ်အနောက်ဘက်ခြမ်းက ရိုဟင်ဂျာ ၁၂ သိန်းလောက် နေရပ်ပြန်ပို့ရေး လွယ်ကူစေဖို့ မြန်မာနိုင်ငံမှာ ဒီမိုကရေစီရရေး အခြေအနေတွေ ဖန်တီးဖို့ မြန်မာနိုင်ငံက ကွဲပြားတဲ့ ပဋိပက္ခတွေကို ချက်ချင်းရပ်စဲဖို့ အကြံပြုထားပါတယ်။
ရိုဟင်ဂျာဒုက္ခသည်တွေ နေရပ်ပြန်နိုင်ရေး အခြေအနေတွေ ဖန်တီးဖို့ မြန်မာနိုင်ငံအတွင်း လူသားချင်းစာနာထောက်ထားမှု အကူအညီတွေ ဘယ်လိုတောင် လိုအပ်နေတယ်ဆိုတာကိုလည်း ကုလသမဂ္ဂ အတွင်းရေးမှူးချုပ်က ပြောခဲ့ပါတယ်။
ဘင်္ဂလားဒေ့ရှ်နိုင်ငံဆီ ၄ ရက်ကြာ တရားဝင်ခရီးစဉ်အပြီး တနင်္ဂနွေနေ့မှာ ဂူတာရက်စ်ဟာ ဒါကာမြို့ကနေ လေယာဉ်နဲ့ ပြန်ထွက်ဖို့ စီစဉ်ထားပါတယ်။
