ဧရာဝတီတိုင်း၊ ဘိုကလေးမြို့နယ်၊ မရဲရွာသစ် တဖက်ကမ်းက ဘုရားကြီးချောင် အာဝါဒေး လောင်းကစားဝိုင်းကို ဝင်ရောက်ဖမ်းဆီးခဲ့ပြီး ငွေကြေးတောင်းယူကာ ဖမ်းဆီးခံရသူတွေကို ပြန်လည်လွှတ်ပေးခဲ့တယ်လို့ ဒေသခံတွေဆီက သိရပါတယ်။
အာဝါဒေး လောင်းကစားဝိုင်းတွေကို အပတ်စဉ် နယ်မြေခံရဲတပ်ဖွဲ့က လိုင်းကြေးယူပြီး ခွင့်ပြုထားတာ ဖြစ်ပေမဲ့ မတ် ၁၀ ရက်က တိုင်း၊ ခရိုင်၊ မြို့နယ်အဆင့် ဒုစရိုက်နှိမ်နင်းရေးအဖွဲ့ (ဒန) နဲ့ မြင်းကာကုန်းစခန်းက ဝင်ရောက်ဖမ်းဆီးခဲ့တာလို့ ဆိုပါတယ်။
ဘုရားကြီးချောင် ဒေသခံတယောက်က “ဝင်ဖမ်းတဲ့နေ့က ကြက်ဝိုင်း အကြီးအကျယ် လုပ်နေတဲ့အချိန် တိုက်ကြက်အကောင် ၄၀ နဲ့ ဆိုင်ကယ်အစီး ၃၀ ဖမ်းခံရတယ်။ ၆ ကောင်ဂျင် လောင်းကစားဝိုင်းတွေပါ ပါတယ်။ အာဝါဒေးစီစဉ်တဲ့ ခေါင်းဆောင် ချက်ဖောင်း ကိုလည်း ဖမ်းသွားတယ်။ ပြီးတော့ အရက်ဆိုင်ထဲမှာ ပိုက်ဆံနဲ့ညှိနေတာ ကြားရတယ်” လို့ DVB ကို ပြောပါတယ်။
မတ် ၁၂ ရက် နေ့လယ်ပိုင်းက ဘိုကလေးမြို့အဝင် ချယ်ရီအောင် စားသောက်ဆိုင်မှာ ငွေကြေးတောင်းယူပြီး ပြန်လွှတ်ပေးလိုက်တယ်လို့ ဆိုပါတယ်။
အာဝါဒေး လောင်းကစားဝိုင်းကို လာဖမ်းဆီးချိန် မြင်းကာကုန်းရဲစခန်းမှူး ဒုရဲအုပ် စိုးဇော်၊ နယ်မြေခံနယ်ထိန်း၊ ဖျာပုံ(ဒန) ဒုရဲအုပ် ဇာနည်အောင်၊ အရပ်ဝတ် ဝတ်ဆင်ထားတဲ့ တိုင်း(ဒန) အပြင် ရဲသတင်းပေး အများအပြားနဲ့ လာရောက်ဖမ်းဆီးခဲ့တာလို့ သိရပါတယ်။
