ရခိုင်ပြည်နယ် စစ်တွေမြို့နယ်မှာ မတ် ၁၁ ရက်နေ့ မနက်က စစ်ကောင်စီတပ်နဲ့ အာရက္ခတပ်တော် (AA) တို့ တိုက်ပွဲဖြစ်ပွားခဲ့ပြီး စစ်ကောင်စီတပ်သား ၄၀ လောက် သေဆုံးကာ အများအပြား ဒဏ်ရာရရှိခဲ့တယ်လို့ AA နဲ့ နီးစပ်သူတွေဆီကနေ သိရပါတယ်။

စစ်တွေမြို့နယ် တောကန်ကျေးရွာနားမှာ မတ် ၁၁ ရက်နေ့ မနက် ၁ နာရီကျော်လောက်မှာ နှစ်ဖက် တိုက်ပွဲ အပြင်းအထန်ဖြစ်ပွားခဲ့တယ်လို့ AA နဲ့ နီးစပ်သူတယောက်က DVB ကို ပြောပါတယ်။

တိုက်ပွဲအတွင်း စစ်ကောင်စီတပ်သား ၄၀ လောက် သေဆုံးကာ အများအပြားဒဏ်ရာရရှိခဲ့ပြီး မတ် ၁၁ ရက် မွန်းလွဲပိုင်းအထိ စစ်ကောင်စီဘက်က အလောင်းလာမကောက်နိုင်သေးဘူးလို့ ဆိုပါတယ်။

“စစ်တွေမြို့နယ်ထဲမှာ အခုရက်ပိုင်းအတွင်း တိုက်ပွဲတွေ ပြင်းထန်နေတယ်ဗျ။ ဒရုန်းနဲ့ ဗုံးကြဲသံတွေ၊ ၆၀ မမ အသံတွေ၊ လက်နက်ကြီး လက်နက်ငယ်တွေနဲ့ ပစ်ခတ်သံတွေ မကြာခဏ ကြားနေရတယ်"လို့ ပြောပါတယ်။

တိုက်ပွဲအတွင်း စစ်ကောင်စီဘက်က ထိခိုက်သေဆုံးတဲ့အခြေနေကို DVB က သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

စစ်တွေမြို့နယ် ဝါဘိုကျေးရွာကိုလည်း မတ် ၆ ရက် မနက်ကလည်း ကံ့ကော်ကျွန်းကျေးရွာမှာ တပ်စွဲထားတဲ့ စစ်ကောင်စီတပ်က ဒရုန်းတွေနဲ့ ဗုံးကြဲတိုက်ခိုက်ခဲ့တာကြောင့် နေအိမ် ၄၀ နီးပါး မီးလောင်ကျွမ်းခဲ့တယ်လို့ ဒေသခံတွေဆီကနေ သိရပါတယ်။

စစ်တွေမြို့နယ်မှာ ၂၀၂၅ ခုနှစ် ဇန်နဝါရီ ၁၆ ရက်ကတည်းကစပြီး စစ်ကောင်စီတပ်နဲ့ AA တို့ တိုက်ပွဲစတင်ဖြစ်ပွားခဲ့ကြတာဖြစ်ပြီး လက်နက်ကြီးနဲ့ ပြင်းပြင်းထန်ထန်ပစ်ခတ်ခဲ့သလို၊ ဒရုန်းတွေ စနိုက်ပါတွေနဲ့လည်း အပြန်အလှန် ပစ်ခတ်မှုတွေ နေတိုင်းရှိကြနေပါတယ်။

စစ်တွေမှာ တိုက်ပွဲဖြစ်ပွားပြီးနောက် စစ်ကောင်စီတပ်က လူအင်အားတွေနဲ့ လက်နက်ခဲယမ်းတွေကို လေကြောင်း၊ ရေကြောင်းကနေ ဖြည့်တင်းနေတယ်လို့ သိရပါတယ်။

ရခိုင်ပြည်နယ်မှာ အာရက္ခတပ်တော်က မြို့နယ် ၁၄ ခု သိမ်းပိုက်ထားပြီး၊ စစ်ကောင်စီက မြို့နယ် ၃ မြို့နယ်ကိုသာ ထိန်းချုပ်နိုင်တော့ကာ  စစ်တွေနဲ့ ကျောက်ဖြူတို့မှာ တိုက်ပွဲပြင်းထန်နေပါတယ်။