နှစ်တနှစ်ရဲ့ အပူဆုံးအချိန် နီးကပ်လာတာနဲ့အမျှ အိန္ဒိယနိုင်ငံ အနောက်ဂူဂျာရတ်ပြည်နယ်က လူစည်ကားတဲ့ ဆင်းရဲသားရပ်ကွက်တခုမှာ အလုပ်သမားတွေက ရာချီတဲ့ သွပ်မိုးတွေကို အဖြူရောင်ဆေးသုတ်ဖို့ အလုအယက် လုပ်နေကြပါတယ်။
ဂူဂျာရတ်ပြည်နယ်ရဲ့ အကြီးဆုံးမြို့ အာမဒ်ဒါဘဒ်မှာ မကြာသေးမီနှစ်တွေအတွင်း 46 C (115 F) အထိ မြင့်တက်နေတဲ့ ရာသီဥတု ပြောင်းလဲမှုကို ရင်ဆိုင်နေရပါတယ်။
ဒါကြောင့် အိမ်ထောင်စု ၄၀၀ ပါတဲ့ ဆန်းသစ်တဲ့ အစီအစဉ်အရ နွေရာသီရဲ့ ပူပြင်းတဲ့ အပူချိန်အောက်မှာ အိမ်တွေ အေးအောင် ကြိုးစားနေကြတာပါ။
အိမ်တွင်းအပူရှိန်ဟာ ဖွံ့ဖြိုးဆဲနိုင်ငံတွေက လူတွေရဲ့ ကျန်းမာရေးနဲ့ စီးပွားရေးရလဒ်တွေအပေါ် ဘယ်လိုအကျိုးသက်ရောက်မလဲ၊ အေးတဲ့ ခေါင်မိုးတွေက ဒီဝန်ထုပ်ဝန်ပိုးကို ဘယ်လို သက်သာအောင် လုပ်ပေးမလဲ ဆိုတာကို လေ့လာဖို့ ကမ္ဘာလုံးဆိုင်ရာ သိပ္ပံစမ်းသပ်ချက်တရပ်နဲ့လည်း ချိတ်ဆက်ထားပါတယ်။
ဟိုင်ဒယ်လ်ဘာ့ဂ် တက္ကသိုလ်က ကူးစက်ရောဂါဗေဒပညာရှင် အဓိတိ ဘန်ခါက “စမ်းသပ်ချက်ထဲမှာပါတဲ့ အိမ်တွေရဲ့ တဝက်ကို ခေါင်မိုးအေးအောင် လုပ်ထားပြီး ကျန်တဝက်ကို နဂိုအတိုင်းထားရင်း ကျန်းမာရေးနဲ့ အိမ်ဝန်းကျင်ဆိုင်ရာ သက်ရောက်မှု ရလဒ်ကို ခြေရာခံချင်တာပါ။ ဒီရလဒ်တွေအရ အိမ်တွင်းအပူချိန်ကို လျှော့ချခြင်းရဲ့ အကျိုးသက်ရောက်မှုကို သိချင်ပါတယ်” လို့ ပြောပါတယ်။
တိုက်တေနီယမ်ဒိုင်အောက်ဆိုဒ်လို အလင်းပြန်နိုင်တဲ့ အဖြူရောင်အပေါ်ယံ အကာနဲ့ အမိုးတွေကို ဆေးသုတ်ပေးပြီး နေရောင်ခြည်ကို လေထဲပြန်ပို့ရင်း ခေါင်မိုးက အပူမစုပ်အောင် ဘန်ခါနဲ့ သူ့အဖွဲ့က ကာကွယ်ပေးနေတာပါ။
သေးငယ်ပြီး လေ၀င်လေထွက်မရှိတဲ့ အခန်းအများစုဖြစ်တဲ့ လူနေအိမ်ပေါင်း ၂,၀၀၀ ကျော် ပါပါတယ်။
ဇန်န၀ါရီလလယ်က အမိုးကို အဖြူရောင်ဆေးသုတ်ခဲ့တဲ့ ဒေသခံ ဆူမန် ပရာဗင် ဗန်ဇာရာက ကွာခြားချက်ကို သူသတိပြုမိနေပြီလို့ ပြောပါတယ်။
အရင်တုန်းက ကြမ်းပြင်ပေါ် တောင် မထိုင်နိုင်ဘူး၊ ခုတော့ ညဘက်တွေမှာ ပန်ကာမဖွင့်ရင်တောင် နေလို့ကောင်းတုန်းပဲ” လို့ သူက ပြောပါတယ်။
ဇန်နဝါရီလ အစောပိုင်းမှာ စတဲ့ ခေါင်မိုးဆေးသုတ်တဲ့ ပရောဂျက်မတိုင်မီ လေ့လာမှုအတွက် ရွေးချယ်ထားတဲ့ ဒေသခံတချို့က မခံသာတဲ့ အပူဒဏ်ကနေ သက်သာအောင် သူတို့ရဲ့ခေါင်မိုးတွေကို ပလတ်စတစ်အခင်းတွေနဲ့ ဖုံးပြီး မြက်ခင်းမယ်လို့ ပြောခဲ့တာပါ။
အာမက်ဒါဘက်မြို့က စမ်းသပ်ချက်ကို အချက်အလက်တွေစုရင်း သိပ္ပံပညာရှင်တွေက တနှစ်ကြာ လုပ်ဆောင်မယ်လို့ ဆိုပါတယ်။
စက်မှုတော်လှန်ရေးမတိုင်မီ ဘယ်နှစ်မှာမဆို ဖြစ်နိုင်ချေ ဆယ်ချိုးတချိုးရှိတဲ့ အပူလှိုင်းတွေဟာ ခုတော့ ဖြစ်နိုင်ချေထက် သုံးဆနီးပါး ပိုလာတဲ့အပြင် 1.2C (2.2 F) အထိ အရင်ထက် ပိုပူလာနေတယ်လို့ ၂၀၂၂ ခုနှစ် သဘာဝပတ်ဝန်းကျင် သုတေသနစာစောင်များ ဂျာနယ်မှာ ဖော်ပြတဲ့ လေ့လာချက်က ဆိုထားပါတယ်။
ဘာကီနာဖာဆို စမ်းသပ်ချက် အစောပိုင်းရလဒ်တွေအရ အေးတဲ့ သုတ်ဆေး သုတ်ထားတဲ့ ခေါင်မိုးတွေဟာ သွပ်မိုးပြီး ရွှံ့မံထားတဲ့ အိမ်တွေမှာ 1.2 C (2.2 F) နဲ့ သွပ်မိုးအိမ်တွေမှာ 1.7 C ကြားအထိ အပူချိန် လျှော့ချပေးနိုင်တာ ပြသပြီး နေထိုင်သူတွေရဲ့ နှလုံးခုန်နှုန်းကို ကျဆင်းစေတယ်လို့ ဆိုပါတယ်။
Source : Reuters
