မှုခင်းကျဆင်းရေးအတွက် ရဲအရာရှိတွေအနေနဲ့ မြို့နယ်ရုံးနဲ့စခန်းမှာ ထိုင်မနေဘဲ နယ်မြေတွေကို ကွင်းဆင်းဆောင်ရွက်ဖို့ ပြည်ထဲရေးက ညွှန်ကြားထားတယ်လို့ အုပ်ချုပ်ရေးနဲ့နီးစပ်သူတွေဆီက သိရပါတယ်။
စစ်တပ်က အာဏာသိမ်းပြီးနောက် မြန်မာနိုင်ငံတဝန်း လူသတ်၊ လုယက်၊ ဓားပြတိုက်မှုတွေ များလာပြီး ပြစ်မှုကျူးလွန်သူတွေကို ရဲတွေအနေနဲ့ ဖမ်းဆီးရမိခြင်းမရှိတာကြောင့် နယ်မြေအတွင်း ကွင်းဆင်းဆောင်ရွက်ဖို့ ညွှန်ကြားတာလို့ အုပ်ချပ်ရေးနဲ့နီးစပ်သူတယောက်က DVB ကို ပြောပါတယ်။
“မှုခင်းတွေ ဖြစ်တာများလာလို့ ရန်ကုန်နဲ့မန္တလေးက ရဲတွေကို ပြည်ထဲရေးက သတိပေးတာ။ လုယက်မှုတွေက နည်းမျိုးစုံပဲ။ ထွေအုပ်နဲ့ ရပ်ကျေးအုပ်ချုပ်ရေးအဖွဲ့ကို ပုံစံ ၂၇ မျိုး စာရင်းလုပ်ဖို့ ပြောသလို ရဲတွေကိုလည်း မိမိနယ်မြေထဲမှာ အမှုကြီး ၁၀ မျိုးမဖြစ်အောင် ကွင်းဆင်းဖို့ ပြောတာ။”
ရန်ကုန်က သန်လျင်၊ သာကေတ၊ ဒေါပုံ၊ မြောက်ဒဂုံ၊ တောင်ဒဂုံနဲ့ ဒဂုံဆိပ်ကမ်းတို့မှာ လုယက်မှု ဖြစ်ပါက ရဲစခန်းကိုတိုင်ပေမဲ့ အခင်းဖြစ်ရာနေရာကို လိုက်ပါဖြေရှင်းဆောင်ရွက်ပေးတာမရှိဘူးလို့ မြောက်ဒဂုံမြို့ခံတယောက်က ပြောပါတယ်။
“စခန်းတွေထဲမှာ မြောက်ဒဂုံ အဆိုးဆုံး၊ လုယက်မှုဖြစ်လို့ သွားတိုင်ရင် စစ်တပ်ကို ပြန်စောင့်နေတာ၊ စစ်တပ် မပါရင် မလိုက်ရဲဘူး သူတို့ကပြောသေးတယ်။ ရပ်ကွက်ထဲမှာ သူတို့ကို တခုခုလုပ်ရင် တာဝန်ယူမလားဆိုပြီး။”
ဒီလိုညွှန်ကြားတာဟာ လုံခြုံရေးကို အကြောင်းပြပြီး စခန်းထဲကနေ အပြင်မထွက်ဘဲ လိုင်းကြေးယူပြီး နေထိုင်စားသောက်နေတဲ့ မြို့နယ်မှူး၊ စခန်းမှူးတွေ နဲ့ နယ်ထိန်းအင်ချပ်တွေကို အငြိမ်းစားရဲဝန်ထမ်းဟောင်းတယောက်က အခုလို သုံးသပ်ပြောဆိုပါတယ်။
“ယူနီဖောင်းနဲ့ကျတော့ ရပ်ကွက်ထဲ မသွားရဲဘူး၊ လိုင်းကြေးကျတော့ အရပ်ဝတ်နဲ့သွားတောင်းတဲ့ မြို့နယ်မှူး၊ စခန်းမှူးတွေရှိတယ်။ အဲဒီလိုလူတွေရှိတဲ့ မြို့နယ်တွေမှာ မှုခင်းဖြစ်တာများတယ်။ သူတို့ကိုယ်တိုင်က ခိုးဆိုးခါးတွေ ပေါင်းပြီး လုပ်စားနေတာ၊ ပြစ်မှုကျူးလွန်လာရင် မဖမ်းဘူး ခြေချုပ်ခံဝန်နဲ့ ပြန်လွှတ်တာ။”
ရပ်ကွက်နဲ့ ကျေးရွာအုပ်ချုပ်ရေးမှူးကို လုံခြုံရေးအရ သတိထားနေထိုင်ဖို့ နေပြည်တော် ပြည်ထဲရေးဝန်ကြီးဌာနမှာ မတ် ၄ ရက်နေ့ ဒုဗိုလ်ချုပ်ကြီး ထွန်းထွန်းနောင်က သတိပေး ပြောဆိုခဲ့တာလည်း ရှိပါတယ်။
