အပြည်ပြည်ဆိုင်ရာ အမျိုးသမီးများနေ့အထိမ်းအမှတ်အဖြစ် ပြင်သစ်နိုင်ငံ မြို့တော် ပါရီမြို့ရဲ့ လမ်းမတွေပေါ်မှာ အမျိုးသမီးသောင်းနဲ့ချီပြီး မတ်လ ၈ ရက်ကမှာ ချီတက်ခဲ့ ကြပြီး အမျိုးသမီးတွေရဲ့ အခွင့်အရေးအခြေအနေ တိုးတက်ကောင်းမွန်လာဖို့တောင်းဆို ဆန္ဒပြခဲ့ကြပါတယ်။
ရောင်စုံဆိုင်းဘုတ်တွေ ကိုင်ဆောင်ရင်း အမျိုးသမီးရေးဝါဒ ကြွေးကြော်သံတွေ ဟစ်ကြွေးခဲ့တဲ့ ဆန္ဒပြသူတွေဟာ ပြည်သူ့ရင်ပြင်မှာ စုဝေးခဲ့ကြပြီး နောက်ဆုံးမှာ နိုင်ငံတော် ရင်ပြင်ဆီသွားတဲ့ လမ်းတွေတလျှောက် လူတွေ ပြည့်လျှံသွားခဲ့ပါတယ်။
အသက် ၇၂ နှစ်အရွယ် ပြင်သစ်အမျိုးသမီး ယက်ဇေးပီလီကော့တ်ကို ဂုဏ်ပြုဖို့ သူ့ကို ထောက်ခံသူတွေက ဒီချီတက်ပွဲကို ဆင်နွှဲခဲ့တာပါ။
ယက်ဇေးရဲ့ ခင်ပွန်းဟောင်းနဲ့ ပူးတွဲတရားခံ အယောက် ၅၀ ကျော်ကို ၃ လကြာ စစ်ဆေးတဲ့ တရားခွင်ဟာ မနှစ်က နှောင်းပိုင်းမှာ ကမ္ဘာကို ထိတ်လန့် တုန်လှုပ်သွားစေတဲ့ အမှုတွဲတခု ဖြစ်ခဲ့ပြီး အမျိုးသမီးတွေရဲ့ ရဲရင့်မှုနဲ့ ခံနိုင်ရည်ရှိမှုသင်္ကေတဖြစ်လာခဲ့ပါတယ်။
ယက်ဇေးရဲ့ ခင်ပွန်းဟောင်း ဒိုမီနစ် ပီလီကော့တ်ဟာ ယက်ဇေးကို ဆယ်စုနှစ်လောက်အတွင်း အကြိမ်ကြိမ် ဆေးခတ်ပြီး မုဒိမ်းကျင့်ခဲ့သလို သူနဲ့အတူ မုဒိမ်းကျင့်ဖို့ သူစိမ်းယောကျ်ား ဒါဇင်ပေါင်းများစွာကို ဖိတ်ခေါ်ခဲ့မှုတွေအတွက် ထောင်ဒဏ် အနှစ် ၂၀ ကျခံဖို့ ပြင်သစ် တရားရုံးက ၂၀၂၄ ခုနှစ် ဒီဇင်ဘာလမှာ စီရင်ချက် ချမှတ်ခဲ့ပါတယ်။
ဒီတရားခွင်ကို ပြီးမြောက်အောင် ရင်ဆိုင်ခဲ့တဲ့ ယက်ဇေးဟာ အရမ်းကို သတ္တိရှိသူဖြစ်ကြောင်း၊ လိင်ပိုင်းဆိုင်ရာ အကြမ်းဖက်မှုတွေ၊ မုဒိမ်းမှုတွေ ကြုံတွေ့ခဲ့ရတဲ့ အမျိုးသမီးတွေအားလုံးအတွက် ထုတ်ဖော်ပြောဆိုခဲ့တဲ့သူဖြစ်ကြောင်း ဆန္ဒပြရာမှာပါဝင်တဲ့ ဂမ်ဘီနိုက ပြောပါတယ်။
Photo: Reuters
