မန္တလေးတိုင်း မြင်းခြံမြို့မြောက်ဘက်အခြမ်းက ကျေးရွာတွေကို မတ်လ ၄ ရက်နေ့ကစတင်ပြီး ၆ ရက်နေ့အထိ စစ်ကောင်စီတပ်က စစ်ကြောင်းထိုးဝင်ရောက်ပြီး ကျေးရွာတွေကို မီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

မတ်လ ၃ ရက်နေ့ မနက် ၁၀ နာရီလောက်က မြင်းခြံမြို့ အမှတ် ၁၈ ရပ်ကွက်မှာရှိတဲ့ စစ်ကောင်စီဂိတ်စခန်းတခု တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၄ ယောက်သေဆုံးပြီး ကား၁ စီးမီးရှို့ဖျက်ဆီးခံခဲ့ရတာကြောင့် အထိနာပြီး အခုလို့ ကျေးရွာတွေကို မီးရှို့ဖျက်ဆီးခဲ့တာလို့ ဆိုပါတယ်။

မတ်လ ၆ ရက်နေ့ မနက်ပိုင်းမှာတော့ မဲရုံမဲလှဘက်ကို စစ်ကြောင်းထိုးဝင်ရောက်နေပြီး မတ်လ ၅ ရက်နေ့ မနက်က မေဇွန်း၊ မင်္ဂလာခြံ၊ ရွာသစ် ကိုစစ်ကြောင်းထိုး ဝင်ရောက်ခဲ့တယ်လို့ ဆိုပါတယ်။

ဒါအပြင် မတ်လ ၄ ရက်နေ့က မြင်းခြံမြောက်ဘက်အခြမ်းက ကျေးရွာတွေကို ဝင်ရောက်စီးနင်းပြီး ဇယက်နီတာပေါင်ဘက်ကို မီးရှို့ဖျက်ဆီးခဲ့ပါတယ်။

မြင်းခြံမြို့ ဒေသခံတဦးက” စစ်တပ်က သူတို့ဘက်က အထိနာပြီဆိုတာနဲ့ ဒေသခံတွေကိုဖမ်းဆီးတာ ကျေးရွာတွေကို ဝင်ရောက်စီးနင်း မီးရှို့ဖျက်ဆီးတာက သူတို့ အမြဲလုပ်နေကြပဲလေ။ အဓိက က ဒေသခံတွေ ဘေးလွတ်ရာမှာ အချိန်မီ ရှောင်ရှားနိုင်ဖို့ အရေးကြီးတယ်”လို့ DVBကို ပြောပါတယ်။

စစ်ကောင်စီတပ်က မြင်းခြံမြို့ပေါ်ရပ်ကွက်တွေနဲ့ မြင်းခြံမြို့နယ်ထဲက ကျေးရွာတွေကို ဝင်ရောက်စီးနင်းတာတွေပြုလုပ်နေပြီး စစ်ကြောင်းထိုးဝင်ရောက်ရာ လမ်းတလျှောက် ဒေသခံတော်လှန်ရေးတပ်ဖွဲ့တွေနဲ့ ထိတွေ့တိုက်ပွဲတွေ ဖြစ်ပွားနေတယ်လို့ မြေပြင်မှာတိုက်ပွဲဝင်နေတဲ့ တော်လှန်ရေးတပ်ဖွဲ့တွေဆီက သိရပါတယ်။