ပလောင်ပြည်နယ်လွတ်မြောက်ရေးတပ်ဦး (PSLF/TNLA) နဲ့ အာဏာသိမ်း စစ်ကောင်စီဘက်က ကိုယ်စားလှယ်အဖွဲ့တို့ ဧပြီလထဲမှာ နောက်ထပ်တကြိမ် ထပ်မံတွေ့ဆုံဆွေးနွေးဖို့ရှိပေမဲ့ တွေ့ဆုံမယ့်ရက် အတိအကျကို မသိသေးဘူးလို့ PSLF/TNLA အထွေထွေအတွင်းရေးမှူး ဗိုလ်ချုပ် တားဘုန်းကျော်က ပြောပါတယ်။

တရုတ်အစိုးရရဲ့ စီစဉ်မှုနဲ့ ပထမတကြိမ်တွေ့ဆုံမှုကို ဖေဖော်ဝါရီ ၁၆ နဲ့ ၁၇ ရက်က တရုတ်နိုင်ငံ ယူနန်ပြည်နယ်၊ ကူမင်းမြို့က ဟိုင်ဂင်ဟော်တယ်မှာ တွေ့ဆုံဆွေးနွေးခဲ့ကြပြီး အဲဒီတွေ့ဆုံမှုကို TNLA ဘက်က ဒုတိယဗိုလ်ချုပ်ကြီး တားဂျုတ်ဂျား ဦးဆောင်ဆွေးနွေးခဲ့သလို အာဏာသိမ်းစစ်ကောင်စီဘက်က ကစထ(၁)မှူး ဒုတိယဗိုလ်ချုပ်ကြီးကိုကိုဦးက ဦးဆောင် ဆွေးနွေးခဲ့တာပါ။

အဲဒီတွေ့ဆုံမှုမှာ နှစ်ဖက်ညှိနှိုင်းဆွေးနွေးမှု ခက်ခဲတဲ့ အခြေအနေ ရှိခဲ့တဲ့အချက်တွေကို သက်ဆိုင်ရာ အဖွဲ့အစည်းတွေကြား ဆွေးနွေးပြင်ဆင်မှုတွေလုပ်ပြီး ထပ်မံတွေ့ဆုံဖို့ သဘောတူခဲ့တာဖြစ်ပြီး TNLA ဘက်ကတော့ နှစ်ဖက်တပ်တွေ ရောက်တဲ့နေရာမှာရပ်ပြီး အပစ်အခတ်ရပ်စဲဖို့ အပါအဝင် အချက် ၃ ချက်ကို ဆွေးနွေးခဲ့ပါတယ်။

ဒါပေမဲ့ အာဏာသိမ်းစစ်ကောင်စီဘက်ကတော့ တွေ့ဆုံဆွေးနွေးမှု လုပ်ဆောင်ပြီးနောက်ပိုင်းမှာ ပလောင်ပြည်နယ်လွတ်မြောက်ရေးတပ်ဦး (PSLF/TNLA) ထိန်းချုပ်ထားတဲ့ မြို့တွေနဲ့ နေရာအများစုကို အရင်ကထက် လေကြောင်းတိုက်ခိုက်မှုတွေကို ပိုမိုလုပ်ဆောင်ခဲ့တာကြောင့် အရပ်သား ထိခိုက်သေဆုံး ဒဏ်ရာရမှုတွေလည်း ရှိခဲ့ပါတယ်။