ရန်ကုန်၊ လှိုင်မြို့နယ်၊ ၉ ရပ်ကွက်၊ လှိုင်ရတနာအိမ်ရာက တိုက်အမှတ် ၅၊ ၆ လွှာမှာ မတ် ၃ ရက် ည ၇ နာရီခွဲလောက်က တိုက်ခန်းမီးလောင်ခဲ့ပြီး သေဆုံးသူ အဘိုးအိုကို ရဲစခန်းက အမှုဖွင့်ထားတယ်လို့ မြို့ခံတွေက ပြောပါတယ်။
၈ ထပ်တိုက်ရဲ့ ၆ လွှာက တိုက်ခန်းတခုမှာ လျှပ်စစ်မီးပြတ်နေတာကြောင့် ဖယောင်းတိုင်သုံး ဘုရားမီးပူဇော်ရာက မီးလောင်မှု စတင်ခဲ့တာ ဖြစ်ပါတယ်။
မီးလောင်မှုကြောင့် တိုက်ခန်းနေ အသက် ၆၅ နှစ်ကျော်အရွယ် အဘိုးတယောက် မီးလောင်သေဆုံးခဲ့သလို အသက် ၅၀ အရွယ် အမျိုးသမီးတယောက်နဲ့ အသက် ၃၀ ကျော်အရွယ် အမျိုးသားတို့မှာ မျက်နှာ၊ မျက်လုံး၊ လက်နှစ်ဖက်တို့မှာ မီးလောင်ဒဏ်ရာတွေ ရရှိခဲ့ကြပါတယ်။
ကယ်ဆယ်ရေးအဖွဲ့ဝင်တယောက်က “မီးက ဖယောင်းတိုင်ကနေ ကူးစက်လောင်ကျွမ်းတာပါ။ မီးများတာထက် အထပ်မြင့်ဆိုတော့ ငြှိမ်းဖို့ ခက်ခဲတာမျိုး ရှိပါတယ်။ လူနာ ၂ ဦး၊ သေဆုံး ၁ ဦးပါ။ ပျက်စီးတန်ဖိုးကတော့ မီးသတ်က စစ်နေပါတယ်” လို့ ပြောပါတယ်။
မီးလောင်မှုကြောင့် အကျယ် ၁၂ ပေ၊ အရှည်ပေ ၄၀ ရှိ တိုက်ခန်းတခုလုံးနဲ့ အတွင်းပစ္စည်းအားလုံး ပျက်စီးပြီး မီးသတ်နဲ့ အရပ်ဘက် ပူးပေါင်းငြှိမ်းသတ်ခဲ့လို့ ည ၇ နာရီ မိနစ် ၅၀ မှာ မီးငြိမ်းသွားပါတယ်။
သေဆုံးသူနဲ့ ထိခိုက်ဒဏ်ရာရရှိသူတွေကို အရပ်ဘက် လူမှုကူညီရေးယာဉ်တွေနဲ့ နီးစပ်ရာဆေးရုံ ပို့ဆောင်ကုသပေးထားကြပြီး သေဆုံးသူ အဘိုးအိုကို မီးပေါ့ဆမှု ပုဒ်မ ၂၈၅၊ လူသေစေမှု ပုဒ်မ ၃၀၄ (က) နဲ့ လှိုင်ရဲစခန်းက အမှုဖွင့်ထားတယ်လို့ ရဲတပ်ဖွဲ့နဲ့ နီးစပ်သူတွေဆီက သိရပါတယ်။
