ရှမ်းပြည်နယ်တောင်ပိုင်း၊ ညောင်ရွှေမြို့နယ်နဲ့ ပင်လောင်းမြို့နယ်က ကျေးရွာတွေထဲကို စစ်ကောင်စီက လေကြောင်း၊ လက်နက်ကြီး ပစ်ခတ်မှုတွေကြောင့် ဖေဖော်ဝါရီလ တလအတွင်း ပြည်သူ ၅ ယောက် သေဆုံးပြီး ၉ ယောက် ဒဏ်ရာရခဲ့တယ်လို့ အင်းလေးဒေသ လူ့အခွင့်အရေးအဖွဲ့က မတ် ၂ ရက်မှာ ထုတ်ပြန်ပါတယ်။

ညောင်ရွှေမြို့နယ်၊ ရေပူကျေးရွာ၊ တောင်ပို့ကွဲကျေးရွာ၊ ဘုရားတောင်ကျေးရွာ၊ ညောင်လေးပင်ကျေးရွာနဲ့ ပင်လောင်းမြို့နယ် နန်းတုတ်ကျေးရွာတို့ကို စစ်ကောင်စီတပ်က လက်နက်ကြီးနဲ့ ၁၁၁ ကြိမ်၊ ဒရုန်းနဲ့ ဗုံးသီးချတိုက်ခိုက်မှု အကြိမ် ၂၀၊ လေကြောင်းကနေ ဗုံးကြဲမှု ၅ ကြိမ်၊ မီးလောင်ဗုံးကြဲမှု ၁ ကြိမ် ပြုလုပ်ခဲ့တယ်လို့ သိရပါတယ်။

အဆိုပါတိုက်ခိုက်မှုကြောင့် အသက် ၁၀ နှစ်အရွယ် ကလေးငယ် အပါအဝင် ပြည်သူ ၅ ယောက် သေဆုံးပြီး ၉ ယောက် ဒဏ်ရာရရှိကာ နေအိမ် ၂၄ လုံးနဲ့ စာသင်ကျောင်း ၁ ကျောင်းလည်း ပျက်စီးခဲ့ပါတယ်။

ရှေ့တန်းရဲဘော်တယောက်က “လက်နက်ကြီးနဲ့ ပစ်ခတ်တာတွေရှိတယ်။ အရင်ရက်တွေကလိုတော့ မများဘူး။ ပြည်သူတွေလည်း စစ်ရှောင်ကြတယ်” လို့ ပြောပါတယ်။

စစ်ကောင်စီတပ်နဲ့ PNO ပြည်သူ့စစ်တွေက ပြည်သူ့နေအိမ်တွေကိုလည်း မီးရှို့ဖျက်ဆီးနေပြီး လက်နက်ကြီးနဲ့ ရမ်းသန်းပစ်ခတ်တာ၊ လေကြောင်းကနေ တိုက်ခိုက်တာတွေကိုလည်း မကြာခဏ ပြုလုပ်နေတယ်လို့ သိရပါတယ်။

စစ်ကောင်စီ တိုက်ခိုက်မှုကြောင့် ပြည်သူထောင်ချီ နေရပ်စွန့်ခွာ ထွက်ပြေးနေကြပြီး စားနပ်ရိက္ခာ အခက်အခဲရှိနေကာ ပြည်သူတချို့ကတော့ စစ်ဘေးမရှောင်ကြဘူးလို့ သိရပါတယ်။