အိန္ဒိယနိုင်ငံက မြန်မာနိုင်ငံနဲ့ နယ်နိမိတ်တလျှောက် နယ်စပ်ခြံစည်းရိုးခတ်နေတဲ့ စီမံကိန်းရဲ့ အကြီးဆုံး လမ်းပိုင်းတည်ဆောက်ရေးလုပ်ငန်းတွေ စတင်လိုက်ပြီဖြစ်တယ်လို့ အိန္ဒိယသတင်းတွေမှာ ဖော်ပြပါတယ်။

အကွာအဝေး ၈၃ ကီလိုမီတာရှိတဲ့ အဆိုပါ လမ်းပိုင်းစီမံကိန်းကိုတော့ အာရန်နာချယ်ပရာဒေ့ရှ် ပြည်နယ်ထဲမှာ တည်ဆောက်နေတာဖြစ်ကာ နယ်စပ်လမ်းများအဖွဲ့ (BRO) ကနေ ဦးဆောင်သွားမယ်လို့ ဆိုပါတယ်။

လက်ရှိမှာတော့ မဏိပူရပြည်နယ်၊ မိုရေးမြို့အနီး အိန္ဒိယ-မြန်မာနယ်စပ်ရဲ့ ၁၀ ကီလိုမီတာသာ ခြံစည်းရိုးခတ်ထားပြီး မကြာသေးခင်ကတော့ နောက်ထပ် ကီလိုမီတာ ၂၀ ၀န်းကျင်  ပြီးစီးနေပြီဖြစ်တယ်လို့ ဆိုပါတယ်။

အာရန်နာချယ်ပရာဒေ့ရှ် ပြည်နယ်ထဲမှာ တည်ဆောက်နေတဲ့ နောက်ဆုံးစီမံကိန်းကတော့ အိန္ဒိယ-မြန်မာ နယ်စပ်တလျှောက် မရှိသေးတဲ့ အကြီးဆုံး နယ်စပ်ခြံစည်းရိုး စီမံကိန်းဖြစ်လာမှာပါ။

အရှည် ၁,၆၄၃ ကီလိုမီတာ ရှိတဲ့ မြန်မာနဲ့ နယ်စပ်တလျှောက်မှာတော့ အာရန်နာချယ် ဒေသပြည်နယ်နဲ့ ကီလိုမီတာ ၅၂၀၊ နာဂလန်းပြည်နယ်နဲ့ ၂၁၅ ကီလိုမီတာ၊ မဏိပူရပြည်နယ်နဲ့ ၃၉၈ ကီလိုမီတာ၊ မီဇိုရမ်ပြည်နယ်နဲ့ ကီလိုမီတာ ၅၁၀ ထိစပ်နေတာပါ။

၂၀၂၁ ခုနှစ်၊ ဖေဖော်ဝါရီက မြန်မာနိုင်ငံမှာ စစ်အာဏာသိမ်းပြီးချိန်ကတည်းက ပဋိပက္ခနဲ့ တိုက်ပွဲတွေကြောင့် အိန္ဒိယနိုင်ငံဘက်ကို ထောင်နဲ့ချီတဲ့ ဒုက္ခသည်တွေ ထွက်ပြေး ခိုလှုံနေကြရတာဖြစ်ပြီး ခုလိုခြံစည်းရိုးခတ်လိုက်တာက အိန္ဒိယနဲ့ မြန်မာကြား လွတ်လပ်စွာ သွားလာလှုပ်ရှားမှုရဲ့ အဆုံးသတ် အမှတ်အသား ဖြစ်လာခဲ့ပါတယ်။

ဒါ့အပြင် အိန္ဒိယနိုင်ငံ၊ မဏိပူရ်ပြည်နယ်မှာ ဖြစ်ပွားတဲ့ ကသည်းနဲ့ ကူကီးတွေရဲ့ လူမျိုးရေး ပဋိပက္ခဟာလည်း မြန်မာနိုင်ငံက ထွက်ပြေးလာသူတွေကြောင့်လို့ ပြည်နယ်အစိုးရက ယူဆပြီး ဒုက္ခသည်တွေ ထပ်မံဝင်ရောက်လာပါက ဒေသခံအချင်းချင်း ဟန်ချက်ညီမှုကို မတည်မငြိမ် ဖြစ်စေမှာကိုလည်း အစိုးရက စိုးရိမ်နေတာ ဖြစ်ပါတယ်။

လူမျိုးရေးအကြမ်းဖက်မှုတွေနဲ့ ပဋိပက္ခတွေကြောင့် အိန္ဒိယနဲ့ မြန်မာကြား လွတ်လပ်စွာ လှုပ်ရှားသွားလာမှုအစီအစဉ်ကိုလည်း အခုနှစ်အတွင်း ပထမဆုံး ဖျက်သိမ်းခဲ့သလို နယ်စပ် တခုလုံးကို ခြံစည်းရိုးခတ်ဖို့ အစိုးရက  ရူပီးငွေကုဋေ ၃၁,၀၀၀ ထိ သုံးစွဲသွားဖို့ ပြီးခဲ့တဲ့ စက်တင်ဘာလထဲမှာ ခွင့်ပြုပေးလိုက်တာ ဖြစ်ပါတယ်။

Source: Times of India/ News18