ယူကရိန်းနိုင်ငံတောင်ပိုင်းရှိ ကရီဗီအရီမြို့လယ်ခေါင်မှာ ဇူလိုင် ၃၁ ရက်က ရုရှားရဲ့ ဒုံးကျည် ၂ စင်းနဲ့ တိုက်ခိုက်မှုကြောင့် အနည်းဆုံး လူ ၂ ဦး သေဆုံးသွားပါတယ်။
ယူကရိန်းပြည်ထဲရေးဝန်ကြီးဌာနက အပျက်အစီးပုံအောက်မှာ နောက်ထပ် ပိတ်မိနေသူတွေလည်း ရှိတယ်လို့ ပြောပါတယ်။
ဒီတိုက်ခိုက်မှုအတွင်း ဟောင်းလောင်းပေါက် ဖြစ်သွားခဲ့တဲ့ ၉ ထပ်တိုက် အဆောက်အအုံရဲ့ ဘေးဘက်ခြမ်းမှာ မီးခိုးလုံးတွေ တက်နေတာကိုပါ တွေ့ရပါတယ်။
ဒါ့အပြင် နောက်ထပ် ၄ ထပ်တိုက် အဆောက်အအုံကလည်း အကုန်နီးပါး ပျက်စီးသွားတာကို သမ္မတ ဇလန်းစကီးရဲ့ ဗီဒီယိုပို့စ်အရ သိရပါတယ်။
ရုရှားရဲ့ တိုက်ခိုက်မှုကြောင့် တက္ကသိုလ်အဆောက်အအုံတခုနဲ့အတူ လူနေတိုက်တခုကိုပါ ထိမှန်ခဲ့တယ်ဆိုပြီး ဇလန်းစကီး ကိုယ်တိုင် အတည်ပြုပါတယ်။
ယူကရိန်းစစ်ပွဲ မဖြစ်ပွားခင်တုန်းက လူဦးရေ ၆ သိန်းကျော်အထိရှိတဲ့ ကရီဗီအရီမြို့ဟာ သံမဏိထုတ်လုပ်ရေး မြို့တခုဖြစ်သလို ဇလန်းစကီးရဲ့ ကြီးပြင်းရာမြို့လည်း ဖြစ်ပါတယ်။
ယူကရိန်းသမ္မတ ဇလန်းစကီးကတော့ “ဒီအကြမ်းဖက်မှုကြောင့် အထိတ်တလန့်ဖြစ်နေမှာ မဟုတ်သလို အားလျော့သွားစေမှာလည်း မဟုတ်ပါဘူး။ ယူကရိန်းပြည်သူတွေကို ကယ်တယ်နိုင်ဖို့အတွက် အလုပ်လုပ်နေကြပါတယ်” ဆိုပြီး တယ်လီဂရမ်ပေါ်မှာ ထုတ်ပြန်ခဲ့ပါတယ်။
Source - Reuters
